މިއަދު ހެނދުނު އިރުކޭތަ ހިފުމާއި ގުޅިގެން ރާއްޖޭގެ އެކި ހިސާބުތަކުގައި ކޭތަ ނަމާދުކޮށްފި އެވެ.
އެގޮތުން ރާއްޖޭގެ މީހުން ދިރިއުޅޭ ހުރިހާ ރަށްތަކެއްގައި ކޭތަ ނަމާދު ކޮށްފައިވާއިރު، މިއަދު ހެނދުނު 08:50 އިން ފެށިގެން އައްޑޫ ސިޓީގައިވެސް ވަނީ ކޭތަ ނަމާދުކޮށްފަ އެވެ. ކޭތަ ނަމާދު ކޮށްފައި ވަނީ އައްޑޫ ސިޓީގެ ކޮންމެ ރަށެއްގެވެސް އެންމެ ބޮޑު މިސްކިތުގަ އެވެ.
މާލޭގައި ކޭތަ ނަމާދު ކޮށްފައި ވަނީ އަލްއުސްތާޒު ޣާޒީ މުހައްމަދު ތަކުރުފާނުލް އަޢްޒަމް (އިސްލާމީ މަރުކަޒު) ގައި ކަމަށްވާއިރު، ހުޅުމާލޭގައި ކޭތަ ނަމާދު ކުރީ މަސްޖިދުއް ޝައިޚް ޤާސިމް ބިން މުޙައްމަދު އާލް ޘާނީ ގައި އަދި ވިލިމާލޭގައި ކޭތަ ނަމާދުކޮށްފައިވަނީ މަސްޖިދުލް ބިއްރިގައެވެ.
އިރުކޭތަ ހިފާފައިވަނީ އުތުރުގެ ރަށްރަށަށް 08:51 ހާއިރުއެވެ. އަދި ދެކުނުގެ ސަރަހައްދުތަކަށް 09:01 ހާއިރުއެވެ. މާލެ ސަރަހައްދަށް ކޭތަ ހިފާފައިވަނީ 08:56 ހާއިރުއެވެ.
މިފަހަރުގެ އިރުކޭތަ ރާއްޖޭގެ އިތުރުން ފެނުނު ޤައުމުތަކުގެ ތެރޭގައި ސްރީލަންކާ، ޔޫއޭއީ، ސުމަޓްރާ، އިންޑިއާ،އޮސްޓްރޭލިއާ، ފިލިޕީންސް އަދި ސިންގަޕޯރ ހިމެނެއެވެ.
