މިއަހަރު ލިބޭނެ އެންމެ ބޮޑުއަދި އެންމެ ފަހު، ޤަދުރަތީ އަޖާއިބުން ފުރިގެންވާ މަންޒަރު ބަލާލުމާ މިދެމެދަކު ދެން މާގިނަ ވަގުތު ތަކެއް ނެތެވެ. ރާއްޖޭ ގަޑިން މިއަދު 7.38 ގައި ހިފާ އިރުކޭތަ ފެންނާނެ މަދު ޤައުމު ތަކުގެ ތެރޭގައި ރާއްޖެވެސް ހިމެނިފައިވާއިރު ކޭތަ ހިފާ މަންޒަރު ބަލާލަން މިއީ ރަނގަޅު ފުރުސަތެކެވެ. މިއަދު ހެނދުނު 10.32 ވަންދެން އިރުކޭތަ ހިފާފައި ހުންނާނެއެވެ.

 

މިއަދަކީ މީގެ 15 އަހަރު ކުރިން ރާއްޖެއަށް ކުރިމަތިވި ސުނާމީ ކާރިސާ ވެސް ހިނގި ތާރީޚީ ދުވަހެވެ. މަދުން ނޫނީ ނުފެންނަ “ރިންގް އޮފް ފަޔަރ “ގެ ނަން ދެވިފައިވާ މިއަދުގެ އިރުކޭތަ ފެނިގެންދާނީ ދިއްލިފައިވާ ވަށްބުރެއް ހެންނެވެ.

އެހެން ފެންނަ ސަބަބަކީ ކޭތަ ހިފުމުގައި އިރާއި ދުނިޔެއާއި ދެމެދަށް ހަނދު ވަދެ އެއް އޯބިޓެއްގައި ދައުރުވާ ދަނޑިވަޅު ހަނދުގެ ރާސްތާ މާމަތި ވުމުގެ ސަބަބުން އަނދާއި އިރާއި އެއްވަރަށް ފެނުމުގެ ބަދަލުގައި އިރުން ބައެއް ފެންނާތީއެވެ. ފުރިހަމަ އިރުކޭތައެއް ނަމަ މިއާއި ޚިލާފަށް އިރާއި ދުނިޔެއާއި ދެމެދަށް ހަނދު ވަދެ އިރުގެ ހިޔަނި އެއްކޮށް ގެއްލުވާލާނެއެވެ. އެހެންނަމަވެސް މިފަހަރު މި ހިފަނީ ފުރިހަމަ އިރުކޭތައެއް ނޫނެވެ.

މިފަހަރުގެ އިރުކޭތަ ރާއްޖޭގެ އިތުރުން ފެންނާނެ ޤައުމުތަކުގެ ތެރޭގައި ސްރީލަންކާ، ޔޫއޭއީ، ސުމަޓްރާ، އިންޑިއާ،އޮސްޓްރޭލިއާ، ފިލިޕީންސް އަދި ސިންގަޕޯރ ހިމެނެއެވެ.

ރާއްޖެއަށްވެސް އިރުކޭތަ ފެންނައިރު މިކިޔާ ” ރިންގްއޮފް ފަޔާ” ފެނުމުގެ ފުރުސަތު ކުޑަ އެވެ. ދިވެހި ޖައްވީ ކަންތައް ތައް ދިރާސާ ކުރާ މާސް ޖަމްޢިއްޔާ އިން ބުނެފައިވާ ގޮތުގައި އިރު ގެއްލިފައިވާ މަންޒަރު އުތުރުގެ އަތޮޅުތަކަށް 75 އިން ސައްތައަށް ފެންނަ އިރު ދެކުނުގެ އަތޮޅުތަކަށް ފެންނާނީ 58 އިން ސައްތަ އަށެވެ. އަދި މާލެއަށް ފެންނާނެ އިން ސައްތައަކީ 67 އެވެ.

އިރުކޭތަ ބަލާނީ ކިހިނެތް؟

އިރުކޭތަ ހިފާއިރު ހަމަ ލޮލުން ބެލުމަކީ އެއްގޮތަކަށްވެސް ކޮށްގެންވާނެ ކަމެއްނޫނެވެ. ކޭތަ ހިފާ ވަގުތު އިރުގެ އަލި ސީދާ ލޮލަށް އެޅިއްޖެނަމަ ލޮލަށް ގެއްލުންވާނެއެވެ.

ގޭގައި ހަދައިގެން ބޭނުންކުރާ ފިލްޓަރ ތައް ބޭނުން ކުރުމަކީ ވެސް ރައްކާތެރި ގޮތެއް ނޫނެވެ. އަދި ހަމަ އެއާއެކު އަނދިރި އަވި އައިނަކީވެސް އެހާ ބޮޑަށް ބޭނުން ހިފޭ އެއްޗަކަށް ނުވެއެވެ.

ފޮޓޯނެގުމަށްޓަކައި ކެމެރާއިން، ނުވަތަ ދުރުމީ ފަދަ އެއްޗަކުންވެސް ހަމަލޮލުން ބަލައިގެން ނުވާނެއެވެ.

ހަމައެކަނި މިކަމަށް އެންމެ އެކަށޭނަ އެއްޗަކީ އިރުކޭތަ ބަލަން ޚާއްސަކޮށްގެން ހަދާފައި ހުންނަ ޚާއްސަ ސޯލާ ފިލްޓަރުތަކެވެ.

ދެން އެންމެ ރަނގަޅެވެ. މިވަގުތުން ވަގުތަށް އެފަދަ ފިލްޓަރެއް ހޯދުން އުނދަގޫ ކަމަކަށް ވެދާނެއެވެ. އެހެނަސް ކަންބޮޑުވާނެ ކަމެއްނެތެވެ. އިރުކޭތަ ވަގުތުން ބެލޭނެ ގޮތްތައް އެބަ ހުއްޓެވެ. އިންޓަނެޓް ލައިވް ބަލޮގް ތަކާއި ވެބްސައިޓް ތައް ވަނީ މިކަމަށް ތައްޔާރު ވެފައެވެ. މިގެނެސްދެނީ ޔޫޓިއުބުން މިހާރުވެސް ލައިވް ފަށާފައިވާ ލިންކެކެވެ. ބައްލަވާ ލައްވާށެވެ.