މޮރޮކޯ އިން ރާއްޖެއަށް ހަދިޔާކުރި ކާޕެޓް ފޮރިން މިނިސްޓަރު އަބްދުﷲ ޝާހިދު ގެއަށް ނުގެންދަވާ ކަމަށް ރާއްޖޭގެ ފޮރިން މިނިސްޓްރީން ވިދާޅުވެއްޖެއެވެ. ފޮރިން މިނިސްޓްރީން މިހެން ވިދާޅުވެފައި މިވަނީ ފޮރިން މިނިސްޓަރ އަބްދުލްﷲ ޝާހިދު އެމަނިކުފާނުގެ ގެއަށް އެ ކާޕެޓު ގެންދެވި ކަމަށް ބުނެ އެންޓި ކޮރަޕްޝަން ކޮމިޝަނަށް ޝަކުވާ ހުށަހަޅާފައިވަނިކޮށެވެ.
ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރު މުހައްމަދު މިއުވާން މިއަދު އޮންލައިން ނޫސް “ދަ ޕްރެސް”އަށް ދެއްވި އިންޓަވިއުއެއްގައި ވިދާޅުވީ، މޮރޮކޯއިން ހަދިޔާ ކުރި ކާޕެޓް ފޮރިން މިނިސްޓްރީގައި އަދިވެސް އެބަ އޮތް ކަމަށާއި، މިނިސްޓަރު ޝާހިދު އެ ކާޕެޓް ގެއަށް ނުގެންދަވާ ކަމަށެވެ.
ފޮރިން މިނިސްޓަރ އަބްދުލްﷲ ޝާހިދު، މޮރޮކޯ އިން ރާއްޖެއަށް ހަދިޔާކުރި އަގުބޮޑު ކާޕެޓެއް އެމަނިކުފާނުގެ ގެއަށް ގެންދެވިކަމަށް މީސްމީޑިޔާގައި ވެސް ވަނީ އަޑުފެތުރިފަ އެވެ. އަދި އޭސީސީ އަށްވެސް މި މައްސަލަ ހުށައަޅާފައިވާ ކަމަށް މައުލޫމާތު ލިބެއެވެ.
