މިދިޔަ ހޮނިހިރު ދުވަހުގެ ރޭ މެރާކީ ކޮފީ ރޯސްޓާސް ކެފޭގެ ބިއްލޫރިގަނޑު ތަޅާލި މައްސަލައާއި ގުޅިގެން ދެ މީހަކު ހައްޔަރުކޮށްފި އެވެ.
ކޮމިޝަނަރ އޮފް ޕޮލިސް، މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވެފައި ވަނީ މެރާކީ ކެފޭ އަށް ގެއްލުންދިން މައްސަލައާއި ގުޅިގެން ދެ ފިރިހެނަކު ރޭ ހައްޔަރުކޮށްފައިވާ ކަމަށެވެ. ނަމަވެސް އެ މައްސަލައާއި ގުޅޭ އިތުރު އެއްވެސް ތަފްސީލެއް އޭނާ ހާމައެއް ނުކުރައްވަ އެވެ.
މިދިޔަ ހޮނިހިރު ދުވަހުގެ ރޭ 23:05 ހާއިރު، މެރާކީ ކެފޭގެ ބިއްލޫރިގަނޑު ތަޅާލައި ބަޔަކު ވަނީ އިންޒާރުގެ ނޯޓެއް ހަރުކޮށްފަ އެވެ. އެ އިންޒާރު އަމާޒުކޮށްފައި ވަނީ ކުރިން އެތަނުގައި މަސައްކަތްކުރި މުވައްޒަފެއް ކަމުގައިވާ އާމިނަތު އީނާސް (އީނާ) އަށެވެ. އީނާ އަށް ވަނީ ފިރިހެނުން ހެދުން އަޅާ ގޮތަށް ހެދުން އަޅައިގެން އުޅޭ ކަމަށް ބުނެ މިފަހަކަށް އައިސް ބޮޑެތި ފާޑުކިޔުންތަކެއް އަމާޒުވެފަ އެވެ.
Last night we arrested two men in connection to vandalising Meraki Coffee Roasters. Here are some stats on issues we link to ‘extremism in the name of religion’. There is, of course, room to increase competence and improve both institutional & national efforts in tackling these. pic.twitter.com/fWFxIGSG0D
— Mohamed Hameed (@M_Hameedh) November 26, 2019
މީގެ އިތުރުން ހަމީދު ވަނީ 2014 ވަނަ އަހަރުން ފެށިގެން މިދިޔަ އޮކްޓޯބަރު މަހުގެ 31 ވަނަ ދުވަހުގެ ނިޔަލަށް ފުލުހުންނަށް ހުށަހެޅިފައިވާ ދީނީ ހަރުކަށި ފިކުރުގެ މައްސަލަތަކުގެ ތަފާސްހިސާބުތައް އާންމުކުރައްވައިފަ އެވެ.
އެ މައްސަލަތަކުގެ ތެރޭގައި 18 އަހަރުން ދަށުގެ ކުދިން ކައިވެނިކުރުމާއި، ވަކި ޖަމާޢަތް ހަދައިގެން ނަމާދުކުރުމާއި ދީނީ ދަރުސް ދިނުން، ޓެރަރިސްޓް ޖަމާޢަތެއްގެ މެމްބަރަކަށްވުން، ޓެރަރިސްޓް ޖަމާޢަތަކަށް ފައިސާގެ އެހީވުމުގެ އިތުރުން ޓެރަރިޒަމަށް ހިތްވަރު ލިބޭ ފަދަ ކަމެއް ކުރުން ނުވަތަ އެއްވެސް ލިޔުން ނުވަތަ މުޢާމަލާތްކުރުން އަދި ކުޑަކުދިންނަށް ވެކްސިން ދިނުމާއި ޓެރަރިޒަމްގެ އެހެނިހެން ކުށްތައް ހިމެނެއެވެ.
ހަމީދު ވިދާޅުވީ މިފަދަ މައްސަލަތައް ހައްލުކުރުމުގައި މުއައްސަސާތަކުގެ ފެންވަރުގައިވެސް އަދި ޤައުމީ ފެންވަރުގައިވެސް އިތުރަށް މަސައްކަތްކުރުމުގެ ޖާގަ އެބައޮތް ކަމަށެވެ.
