މައިކޮލެޖުގެ ހިތަދޫ ކެމްޕަސްގައި ހިންގި ޔުނިވާސިޓީ ޕްރިޕެރޭޝަން ޕްރޮގްރާމް (ޔޫޕީޕީ) ފުރަތަމަ ބެޗުގެ ގްރެޖުއޭޝަން ރޭ ބާއްވައިފިއެވެ. ރޭ އައްޑޫސިޓީ ހިތަދޫ އީކުއޭޓަރ ކުޒީން ރެސްޓޯރެންޓުގައި ބޭއްވި މި ގްރެޖުއޭޝަންގައި 16 ދަރިވަރަކަށް ސެޓްފިކެޓް ޙަވާލު ކުރެވުނެވެ. އެ ދަރިވަރުންނަށް ސެޓްފިކެޓް ޙަވާލުކޮށްދެއްވީ މި ޙަފުލާގެ ޝަރަފްވެރި މެހުމާނު، ހިތަދޫސްކޫލުގެ ޕްރިންސިޕަލް ޑރ އާސިޔަތު މުޙައްމަދު ދީދީ އެވެ.
ޔޫޕީޕީ ފުރަތަމަ ބެޗުން އެއްވަނަ ހޯދާފައި ވަނީ ސ.މަރަދޫ ހަވާ ޝައުނާ ރަޝީދެވެ. ޝައުނާ އަކީ މަރަދޫ ސްކޫލުގެ މުވައްޒަފެކެވެ.
އެ ޙަފުލާގައި ވާހަކަ ދައްކަވަމުން ޑރ. އާސިޔަތު ވިދާޅުވީ އެފަދަ ތަޢުލީމީ ޚާއްޞަ ފުރުޞަތެއް ބަޔަކަށް ދީގެން އެކަމުގައި ކާމިޔާބު ލިބި، އެ ކާމިޔާބީ ފާހަގަ ކުރާ ޙަފުލާއެގައި ބައިވެރި ވުމުގެ ފުރުޞަތު ލިބުމަކީ ނުހަނު އުފާ ކުރައްވާ ކަމެއް ކަމުގައެވެ. އަދި ޕްރޮގްރާމް ނިންމި ދަރިވަރުންނަށް ކުރިއަށް ދިއުމަށް ވަރަށް ބޮޑަށް ހިތްވަރު ދެއްވެވިއެވެ.
އެ ޙަފުލާގައި ވާހަކަ ދައްކަވަމުން، މައިކޮލެޖުގެ ހިތަދޫ ކެމްޕަސް ހިންގުމާ ހަވާލުވެ ހުންނެވި ޢައިޝަތު ޝިބާނާ ވިދާޅުވީ އެކޮލެޖުން ރޭ އެފަދަ ކުލަގަދަ ޙަފުލާއެއް ބޭއްވީ ޔޫޕީޕީ ޕްރޮގްރާމަކީ ވަރަށް ޚާއްޞަ ޕްރޮގްރާމަކަށް ވާތީ އެވެ.
ޝިބާނާ ވިދާޅުވީ ޔޫޕީޕީ ޕްރޮގްރާމަކީ 4 މަސް ދުވަހުގެ ޕްރޮގްރާމެއް ކަމަށެވެ. އަދި އެ ޕްރޮގްރާމް ނިންމުމަށްފަހު ރާއްޖޭގެ ކޮލެޖު ތަކުންނާއި ޔުނިވާސިޓީން ސީދާ ޑިގްރީ ކޯސްތަކަށް ވަނުމަށް ފުރުޞަތު ލިބޭ ކަމަށެވެ. އެހެންކަމުން އެއީ ކުރިއަށް ދާން ބޭނުންވެ، ފުރުޞަތު ނުލިބިފައި ތިބޭ މީހުންނަށް މަތީ ތަޢުލީމުގެ ފުރުޞަތަށް މަގުފަހި ވެގެންދާ ވަރަށް ޚާއްޞަ ޕްރޮގްރާމެއް ކަމަށެވެ.
ޝިބާނާގެ ވާހަކައިގައި އިތުރަށް ފާހަގަ ކޮށްފައިވަނީ ޔޫޕީޕީގެ ފުރަތަމަ ބެޗް ނިންމި 16 ދަރިވަރުންގެ ތެރެއިން 13 ދަރިވަރުންނަކީ މިހާރު މައިކޮލެޖުގެ ޑީގްރީ ޕްރޮގްރާމުގައި ބައިވެރިވެ ފުރަތަމަ ސެމެސްޓަރ ގެ ކިޔެވުން ފުރިހަމަ ކޮށް ޓެސްޓުވެސް ހަދާފައި ތިބި ދަރިވަރުން ކަމުގައެވެ. އެހެންކަމުން އެފަދަ މަތީ ތަޢުލީމުގެ ފުރުޞަތެއް އެ ދަރިވަރުންނަށްޓކައި ހުޅުވައި ދެވުނީތީ އުފާކުރާ ކަމަށާއި އެކުދިނަނަށްޓަކައި ފަޚުރުވެރިވާ ކަމަށެވެ. “އަޅުގަނޑުމެންނަށް އުނގެނުމުގެ ފުރުޞަތު ހުޅުވައި ލެވުނީ އުނެގުމަށްޓަކައި ފެން ބޮވައިގެންފައި ތިބި ދަރިވަރުންތަކަކަށް، ވަރަށް ފޯރިއާ އެކު ވަރަށް ޝައުޤުވެރިކަމާއެކު ވަރަށް ކިޔަވާހިތުން އެކުދިން ކިޔަވަމުން ދިޔައީ” ޝިބާނާ ވިދާޅުވިއެވެ.
2020 ވަނަ އަހަރު މައިކޮލެޖުގެ ޔޫޕީޕީ ބެޗާއި ސެޓްފިކެޓް 3 ގައި ބައިވެރިވާ ދަރިވަރުންނަށް 50 ޕަސެންޓުގެ ޑިސްކައުންޓު ރޭޓެއް ހުށަހަޅާފައިވާ ވާހަކަ ވެސް ރޭގެ މި ޙަފުލާގައި އިޢުލާން ކުރިއެވެ. ޔޫޕީޕީ ޕްރޮގްރާމުގައި ބައިވެރިވާން ބޭނުންވަނީ ގްރޭޑް 10 އެއް ނިންމާފައި ވުމާއެކު ކުރިއަށްދާން ބޭނުންވާ ދާއިރާއަކާއި ގުޅުން ހުރި ދާއިރާއަކުން 2 އަހަރު ދުވަހުގެ މަސައްކަތު ތަޖުރިބާ ކަމަށާއި މިސާލަކަށް ފިހާރައެއްގެ ކައުންޓަރުގައި މަސައްކަތް ކޮށްފައިވާނަމަ ބިޒްނަސްގެ ދާއިރާއިން ކުރިއަށް ދިއުމަށް މަސައްކަތު ތަޖުރިބާއެއް ކަމުގައި ބެލެވޭނެކަމަށް ޝިބާނަ މައުލޫމާތު ދެއްވިއެވެ. މައި ކޮލެޖުގެ ކޯސްތަކާ ބެހޭގޮތުން އިތުރު މަޢުލޫމާތު ހޯއްދެވުމަށް ގުޅުއްވާނީ 7905391 ނަމްބަރަށެވެ.
ރޭގެ މި ޙަފުލާގައި މައިކޮލެޖުގެ ހިތަދޫ ކެމްޕަހުގެ ސްޓާފުންނާއި ލެކްޗަރާއިންނަށް ވެސް އެބޭފުޅުން ކޮށްދެއްވާ މަސައްކަތުގެ އަގު ވަޒަންކޮށް ހަނދާނީ ލިޔުން ދެވުނެވެ.
