ކ. ގިރިފުށީގައި ތަމްރީނު ހެދުމުގެ ގޮތުން ސިފައިން މިއަދު ބަޑި ޖަހަމުން ދަނިކޮށް، އެ ސަރަހައްދުން ދަތުރުކުރި ސަފާރީއެއްގައި ހުރި ފަތުރުވެރިއެއްގެ ގަޔަށް އެ ރަށުން ޖެހި ވަޒަނެއް އަރައިފި އެވެ.
މައުލޫމާތު ލިބޭގޮތުގައި ވަޒަން އަރާފައިވަނީ އެމީހާގެ ކަރަށެވެ. އެމްއެންޑީއެފް އިން ބުނެފައިވަނީ ޓޫރިސްޓް މީހާގެ ގަޔަށް އަރާފައި ވަނީ ތަނެއްގައި ޖެހި ބާރު ކެނޑިފައިވާ ވަޒަނެއް ކަމަށާއި އަދި ވަޒަން ދަތުރުކޮށްފައިވަނީ އެމީހާގެ ކަރުގެ ބޭރުން ހަންގަނޑު މަތިން ކޭތިލާފައި ކަމަށެވެ.
ވަޒަން އަރާފައިވަނީ “އީގަލް ރޭ” ނަމަކަށް ކިޔާ ސަފާރީގެ ތިން ވަނަ ބުރީގެ ޑެގު މަތީގައި އެމީހާ ސެލްފީ ނަގަން ހުއްޓައެވެ.
މައުލޫމާތު ލިބިފައިވާ ގޮތުގައި ވަޒަން އަރައިގެން ޒަހަމްވެފައިވަނީ ޖަރުމަނުގެ ފަތުރުވެރިއެކެވެ. އެ ހާދިސާ ހިނގިއިރު އެ ސަފާރީ އޮތީ ގިރިފުށީގެ ހުޅަނދު ދެކުނު ފަޅީގައެވެ.
މި ހާދިސާގައި ޒަޚަމްވި މީހާއަށް އިތުރު ފަރުވާ ދިނުމަށް މިހާރު ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ވަނީ ގެންގޮސްފައެވެ. އެމްއެންޑީއެފް އިން ބުނީ އޭނާއަށް ސީރިއަސް ގެއްލުމެއް ލިބިފައި ނުވާ ކަމަށާއި ހާލު ރަނގަޅު ކަމަށެވެ.
ފުލުހުންނާއި އެމްއެންޑީއެފް އިން ވެސް އަންނަނީ މި ހާދިސާ އިތުރަށް ތަހުގީގު ކުރަމުންނެވެ.
އެމްއެންޑީއެފް އިން ބުނީ މިއަދު ސިފައިން ގިރިފުށީގައި ގާއިމްކުރެވިފައިވާ ފަޔަރިން ރޭންޖުގައި ލައިވް ފަޔަރިންގ ފަރިތަކުރުންތަކެއް ކުރިއަށް ގެންދިޔައީ ސަލާމަތާއި ރައްކާތެރިކަމުގެ ފިޔަވަޅު އަޅައިގެން ކަމަށެވެ.
