ރާއްޖޭގެ އެކި ހިސާބުތަކުގައި ކުނި މެނޭޖުކުރުމަށް ސަރުކާރުން އުފައްދާފައިވާ ކުންފުނި، ވޭސްޓް މެނޭޖުމެންޓް ކޯޕަރޭޝަން(ވެމްކޯ) އަށް މިއަހަރުގެ ދެވަނަ ކުއާޓަރުގައި ލިބުނު އާމްދަނީ އިތުރުވެއްޖެ ކަމަށް ޕްރައިވަޓައިޒޭޝަން ބޯޑުގެ އަހަރީ ރިޕޯޓުން ދައްކައިފިއެވެ.
ޕްރައިވެޓައިޒޭޝަން ބޯޑުން އާންމުކޮށްފައިވާ ސަރުކާރު ކުންފުނިތަކުގެ މާލީ ރިޕޯޓުތަކުގެ ތެރެއިން ވެމްކޯގެ ރިޕޯޓް ދައްކާ ގޮތުގައި މިދިޔަ އަހަރުގެ ދެވަނަ ކުއާޓަރާ އަޅާ ބަލާއިރު މިއަހަރުގެ ދެވަނަ ކުއާޓަރުގައި ވެމްކޯއަށް ލިބުނު އާމްދަނީ ވަނީ 44 އިންސައްތަ އިތުރުވެފައެވެ. މިދިޔަ އަހަރާ އަޅަބަލާއިރު ވެމްކޯ އަށް އާމްދަނީގެ ގޮތުގައި 17.84 މިލިއަން ރުފިޔާ ވަނީ އިތުރުވެފައެވެ.
ވެމްކޯ އަށް އާމްދަނީ އިތުރުވި ކަމުގައި ވީނަމަވެސް އެ ކުންފުނީގެ ހިންގުމުގެ ޚަރަދުތައް މެނޭޖު ކުރެވިފައި ނުވާކަން ޕްރައިވެޓައިޒޭޝަން ބޯޑުން ނެރުނު ރިޕޯޓުގައި ފާހަގަކޮށްފައިވެއެވެ. އެގޮތުން ވެމްކޯއިން ކުރާ އެންމެ ބޮޑު ޚަރަދަކީ މުވައްޒަފުންނަށް މުސާރަ އާއި އިނާޔަތްތައް ދިނުން ކަމަށާއި ކުނި ކަލެކްޓުކުުރުމުގެ މަސައްކަތުގައި ގިނަ އަދަދެއްގެ މުވައްޒަފުން ޙަރަކާތްތެރިވާއިރު ކުންފުންޏަށް ބޭނުންވާ މުވައްޒަފުންގެ އަދަދު ރިވިއުކުރުމަކީ މުހިންމު ކަމެއްކަމުގައި އެ ރިޕޯޓުގައި ފާހަގަކޮށްފައިވެއެވެ.
ވެމްކޯގެ މަސައްކަތަކީ ދިވެހި ރައްޔިތުން ވަރަށް ބަލައިގަންނަ މަސައްކަތެވެ. ރާއްޖެ ކަހަލަ ކުޑަ ޖަޒީރާ ޤައުމެއްގަައި އެތައް ޓަނެއްގެ ކުނި އެކި ހިސާބުތަކުން މޫދަށް އަޅަމުން އައި އައުން ވެމްކޯގެ ސަބަބުން ހުއްޓުމަކަށް އައެވެ. އަދި މާލޭ ކަހަލަ ތޮއްޖެހިފައިވާ ތަނެއްގައި ކުނީގެ މައްސަލަ ބޮޑު ނަމަވެސް، ވެމްކޯގެ ސަބަބުން ވަރަށް ބޮޑު ފަސޭހައެއް ރައްޔިތުންނަށް ލިބިގެން ދިޔައެވެ.
