ހުޅުމާލެ ފަރުކޮޅުފުށީގައި ގާއިމްކޮށްފައިވާ ބުޅާ ފެސިލިޓީއަށް މިހާތަނަށް 352 ބުޅާ ގެންގޮސްފައިވާ ކަމަށާއި، އަންނަ ހަފުތާގައި އިތުރު ބުޅާތައް ގެންދަން ތާވަލުކޮށްފައިވާ ކަމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ މިއަދު ވިދާޅުވެއްޖެއެވެ.
ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، އެ ފެސިލިޓީގައި ވެޓެރިނަރީ ކުލިނިކުގެ މަސައްކަތް ފަށައި، ބުޅާ އާލާވުން ހުއްޓުވުމަށް ކުރާ ސާޖަރީތައް ވެސް މިހާރު ކުރިއަށްދާ ކަމަށެވެ. އެގޮތުން މިހާތަނަށް 60 ބުޅާ ނިއުޓާކޮށް، 5 އަންހެން ބުޅާ ސްޕޭކޮށްފައިވާ ކަމަށް މިނިސްޓަރު ހާމަކުރެއްވިއެވެ.
ފެސިލިޓީއަށް ބުޅާ ގެންދާ މިންވަރު މަދުކަމުގެ ޝަކުވާ އާންމުންނާއި މާލެ ސިޓީ ކައުންސިލުން ކުރަމުންދާއިރު، މިނިސްޓަރު ވިދާޅުވީ ކުރިއަށް އޮތް ހަފުތާގައި އިތުރު ބުޅާތައް ފެސިލިޓީއަށް ގެންދިޔުމަށް ޕްލޭން ކުރެވިފައިވާ ކަމަށެވެ. މާލޭގެ މޭޔަރު އާދަމް އާޒިމް ވެސް ވަނީ މާލެ ތެރޭގައި ބުޅާ ގިނަވެ، ނަޖިހުގެ މައްސަލަ ބޮޑުވަމުންދާތީ އެކަމުގެ ކަންބޮޑުވުން ފާޅުކުރައްވާފައެވެ.
ސަރުކާރުން ބުނާ ގޮތުގައި، މި ފެސިލިޓީގެ ބަޖެޓުން ކޮންމެ ބުޅަލަކަށް މަހަކު ގާތްގަނޑަކަށް 368 ރުފިޔާ ހަރަދުވެއެވެ. މިއީ މާލެ ސަރަހައްދުގެ މަގުމަތީގައި ގިނަވެފައިވާ ބުޅަލުގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ފަށާފައިވާ މުހިންމު މަޝްރޫއެކެވެ.
