ޕާކިސްތާނުގެ ބޮޑުވަޒީރުކަން ކުރައްވާފައިވާ ނަވާޒް ޝަރީފް ގެ ސިއްހީ ހާލުކޮޅު ދެރަވެ އޭނާ ގެންދަވަނީ މަރާއި ހަނގުރާމަ ކުރަށްވަމުން ކަމަށް ނަވާޒް ޝަރީފް ބައްލަވާ ޑޮކްޓަރުން ބުނެފިއެވެ.
ނަވާޒް ޝަރީފްގެ މައްޗަށް އެޤައުމުގެ ސަރުކާރުން ކޮށްފައިވާ ކޮރަޕްޝަންގެ ތުހުމަތުތައް އޭނާގެ މައްޗަށް ސާބިތުވެ ޖަލުގައި ހުންނަވަނިކޮށް މިދިޔަ ހަފްތާގައި ވެސް އޭނާ ވަނީ ހިތްހުއްޓި ވަޑައިގެންފައެވެ.
ޢުމުރުފުޅުން 69 އަހަރުފުޅުގެ ނަވާޒް ޝަރީފްގެ ހިތްޕުޅު ހުއްޓިވަޑައިގަތީ އޭނާގެ ލޭގައި ޕްލެޓެލެޓްސް މަދުކަމުން ކަމަށް ޑޮކްޓަރުން ބުނެފައި ވެއެވެ. އަދި ނަވާޒް ޝަރީފްގެ ކިޑްނީ ވެސް މަސައްކަތް ކުރަންޖެހޭ ވަރަށް މަސައްކަތް ނުކުރާކަމަށް ޑޮކްޓަރުން ބުނެފައި ވެއެވެ.
ޖަލުގައި ދުވަސްތައް ހޭދަކުރައްވަމުން ގެންދަވާ ނަވާޒް ވަނީ ހުކުރު ދުވަހު ލާހޫރްގެ ހައިކޯޓުން ބޭސްފަރުވާއަށް ދޫކޮށްލާފަ އެވެ. ޕާކިސްތާނުގެ ބޮޑުވަޒީރުކަން 3 ފަހަރެއްގެ މަތީން ކޮށްފައިވާ ނަވާޒް ޝަރީފް އަށް ވަނީ ކޮރަޕްޝަންގެ ދައުވާ ކޮށް 10 އަހަރަށް ޖަލަށްލާފައެވެ.
