ފިޔާ ހިފައިގެން ރާއްޖެ ދަތުރުކުރި ބޯޓެއް އަޑިއަށް ހިނގައްޖެ އެވެ.
އެސްޓީއޯ ފިޔާ ޝިޕްމެންޓެއް ގެނައި މި ބޯޓު އިއްޔެގެ ވަގުތެއްގައި އަޑިއަށް ގޮސްފައިވާކަމަށް އެސްޓީއޯ އިން ބުނެފައިވާއިރު އެ ބޯޓުގައި ހުރީ ކިހާ އަދަދެއްގެ ފިޔާ ކަމެއް އަދި ސާފުވެފައެއް ނުވެއެވެ.
މި މަހުގެ ކުރީ ކޮޅު އިންޑިއާއަށް ކުރި ގަދަ ވިއްސާރައިގައި ފިޔާ އެކްސްޕޯޓް ކުރުން ދަތިވެ ރާއްޖޭގެ ބާޒާރުގައި ފިޔާގެ އަގުވަނީ އިންތިހާއަށް އުފިލިފައެވެ. މި ގޮތުން ބާޒާރުގައި ފިޔާ ބަސްތާއެއް800ރ. އާއި 1000ރ. އާއި ދެމެދު ވިއްކާފައިވާއިރު އެސްޓިއޯ އިންވެސް ވަނީ ފިޔާ ވިއްކުން ކޯންޓްރޯލްވެސް ކޮށްފައެވެ. އެހެން ނަމަވެސް އިންޑިޔާއިން ރާއްޖެ އަށް ފިޔާ ލިބެން ފެށުމާ އެކު މިހަފްތާއިން ފެށިގެން ފިޔާގެ އަގު ވަނީ އާންމު ކޮށް ލިބެން ހުންނަ އަގުތަކަށް ބަދަލުވެފަ އެވެ.
