ބޭރުގެ ޔުނިވަރސިޓީތަކުން މަތީ ތަޢުލީމް ހާސިލްކުރުމުގެ ފުރުސަތު އިތުރަށް ފުޅާކުރުމުގެ މަޤްޞަދުގައި، “ކޯޕަރޭޓް ސްކޮލަރޝިޕް ސްކީމް”ގެ ނަމުގައި މިނިސްޓްރީ އޮފް ހަޔަރ އެޑިއުކޭޝަނުން އާ ސްކޮލަރޝިޕް ސްކީމެއް ތަޢާރަފްކޮށްފި އެވެ.
މި ސްކޮލަރޝިޕް ސްކީމަކީ ބޭރުގެ ޔުނިވަރސިޓީތަކުން ދިވެހި ސަރުކާރަށް ދޭ ޕާޝަލް ސްކޮލަރޝިޕްތަކުގެ ބާކީބައި، ސަރުކާރު ހިއްސާވާ ކުންފުނިތަކުން ދައްކައިދޭނެ އެވެ. އޭރުން އެ ސްކޮލަރޝިޕް ފުލީ ފަންޑެޑް ސްކޮލަރޝިޕަކަށް ބަދަލުވެގެންދާނެ އެވެ. މިގޮތަށް ހެދުމުގެ މައިގަނޑު މަޤްޞަދަކީ ވީހާވެސް ގިނަ ދަރިވަރުންނަށް މަތީ ތަޢުލީމަށް ކިޔެވޭނެ މަގު ތަނަވަސްކޮށްދިނުމެވެ.
މިއަދު ހަވީރު އިސްލާމީ މަރުކަޒުގައި ބޭއްވި ރަސްމިއްޔާތެއްގައި ސަރުކާރާއި ކުންފުނިތަކާމެދު ވެވުނު އެއްބަސްވުން އެ ކުންފުނިތަކާއި ހަވާލުކޮށްދެއްވީ ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން އެވެ. މިއަދުގެ ރަސްމިއްޔާތުގައި ހަތް ކުންފުންޏަކާއެކު ވަނީ އެއްބަސްވުމުގައި ސޮއިކޮށްފަ އެވެ.
