ކުންޏަކީ ފައިސާ ލިބޭ ވަސީލަތަކަށް ހެދުމަށް ސަރުކާރުން ކުރި ވައުދު ފުދެންފެށުނީ ކަމަށް އެންވަޔަރްމަންޓް މިނިސްޓަރު ޑރ. ހުސެއިން ރަޝީދު ހަސަން ވިދާޅުވެއްޖެއެވެ.
ރ. ވަންދޫ ކުނި މެނޭޖުކުރާ ސަރަހައްދީ މަރުކަޒުގައި ފުރަތަމަ ފަހަރަށް ކުނިން ކަރަންޓު އުފައްދަން ފެށިކަން އިއުލާން ކޮށްދެއްވަމުން މިނިސްޓަރ ކުރެއްވެވި ޓްވީޓެއްގައި ވިދާޅުވީ ރ. ވަންދޫގައި ކުނިން ކަރަންޓު އުފައްދަން ފެށުމާއެކު، ކުންޏަކީ އާމްދަނީ ލިބޭ އެއްޗަކަށް ހެދުމަށް ސަރުކާރުން ވީ ވައުދު ފުއްދެން ފެށުނީ ކަމަށެވެ. މިއީ ތާރީހީ ކާމިޔާބެއް ކަމަށް ވިދާޅުވި އެވެ.
ކުނިން ކަރަންޓު އުފައްދަން ފެށި ވަންދޫ ރީޖަނަލް ވޭސްޓް މެނޭޖްމަންޓް ސެންޓަރަކީ ނ. ރ. ބ. އަދި ޅ. އަތޮޅުގައި އުފެދޭ ކުނި ނައްތާލަން ގާއިމްކޮށްފައިވާ ތަނެކެވެ.
މި މަސައްކަތް ކުރަނީ ކުނި އަންދައިގެން ކަރަންޓު އުފެދޭ ގޮތަށް ވޭސްޓް އެނާޖީ ޕްލާންޓެއް ގާއިމްކޮށްގެންނެވެ. އެއީ ކުނި އަންދައިގެން އުފެދޭ ހޫނުން، ފެނުން އާވި އުފައްދައިގެން އެ އާވިން ޑައިނަމޯ އަނބުރައިގެންނެވެ.
ރާއްޖޭގައި އުފައްދާ ކަރަންޓުގެ ތެރެއިން 94 ޕަސެންޓަކީ ޑީސަލް އަންދައިގެން ލިބޭ ކަރަންޓު ކަމަށާއި އެހެންކަމުން ކުނި އަންދައިގެން ކަރަންޓު އުފެދޭ ގޮތްވުމަކީ ސަރުކާރުގެ ހަރަދު ކުޑަވާނެ ކަމެއްކަމަށް މިނިސްޓަރ ވަނީ ވިދާޅުވެފައެވެ.
ކުނިން ކަރަންޓް އުފެއްދުމުގެ މި މަޝްރޫއަށް އިންޓަނޭޝަނަލް ރިނެވެބަލް އެނާޖީ އޭޖެންސީ (އައިއާރްއީއެންއޭ) މެދުވެރިކޮށް އަބޫދާބީ ފަންޑް ފޯ ޑިވެލޮޕްމަންޓް (އޭޑީއެފްޑީ) އިން ވަނީ 92.7 މިލިއަން ލޯނެއް ދީފައެވެ. މި ލޯނު އިއުލާން ކޮށްފައި ވަނީ އެނާޖީ އޭޖެންސީގެ ހަތަރުވަނަ އަހަރީ އާންމު ބައްދަލުވުމުގައެވެ.
މި މަޝްރޫއުގެ ދަށުން ދެ މެގަވަޓްގެ ކުނިން ކަރަންޓު އުފެއްދާ ޕްލާންޓް ގާއިމް ކުރުމަށް ނިންމީ ރާއްޖޭގެ ތިން ސަރަހައްދެއްގައެވެ. އެ ސަރަހައްދުތަކުގެ ތެރޭގައި، ހދ. ކުޅުދުއްފުށި، ރ. ވަންދޫ އަދި އައްޑޫ ސިޓީ ހިމެނެއެވެ.
