ފަސް މިލިއަން ގަސް އިންދުމުގެ މަސައްކަތް އަންނަ މަހު ފަށާނެ ކަމަށް އެންވަޔަރަންމަން، ކްލައިމެޓް ޗޭންޖް އެންޑް ޓެކްނޯލޮޖީ މިނިސްޓަރ ތޯރިގް އިބްރާހީމް ވިދާޅުވެއްޖެ އެވެ.
މި ސަރުކާރުން ކުރިއަށް އޮތް ފަސް އަހަރު ތެރޭގައި ފަސް މިލިއަން ގަސް އިންދުމަށް ރައީސް ޑރ. މުހައްމަދު މުއިއްޒު ވަނީ ވައުދުވެލައްވާފަ އެވެ. އެ ވައުދު ފުއްދުމުގެ މަސައްކަތް ތިމާވެށީގެ ދުވަހާ ގުޅުވައިގެން ފަށަން ވަނީ ނިންމައިފައެވެ.
މިނިސްޓަރު ވިދާޅުވީ ޖޫން 5 ވަނަ ދުވަހު ފެށޭ މި ޕްރޮގްރާމުގެ ދަށުން ރާއްޖޭގެ ހުރިހާ ރަށަކަށާއި ރިސޯޓުތަކަށް ވެސް ފެތުރޭނެ ކަމަށެވެ. މި ޕްރޮގްރާމުގެ ފުރަތަމަ ފިޔަވަހީގައި ރާއްޖެއިން ނެތިދިއުމުގެ ބިރު ހީވެފައިވާ ބާވަތްތަކާއި ރާއްޖެ އަށް ފެތޭ މޭވާ ގަހާއި ހިޔާދޭ ގަސްތަކާއި، ދިވެހި ބޭސްވެރިކަމަށް ބޭނުންކުރާ ގަސްތައް އިންދާނެ އެވެ.
ދެން އަންނަ ފިޔަވަހީގައި 90 އަށް ވުރެ ގިނަ ބާވަތުގެ ގަސް އިންދާނެ ކަމަށް މިނިސްޓަރު ވިދާޅުވި އެވެ. މީގެ އިތުރުން، މި މަސައްކަތް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި ރަށްރަށުގައި ނާސަރީތައް ހަދައި، އާންމުންނަށް ގަސް ލިބޭނެ އިންތިޒާމު ހަމަޖައްސާނެ ކަމަށް ވެސް ވިދާޅުވި އެވެ. މި މަޝްރޫއަކީ ދިވެހިރާއްޖޭގެ ތިމާވެށި ރައްކާތެރިކޮށް ހިމާޔަތްކުރުމަށް އަޅާ މުހިންމު ފިޔަވަޅެކެވެ.
