ދުނިޔޭގައި ބާއްވާ އެންމެ ބޮޑު ސީފުޑް އެކްސްޕޯ ގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބައިވެރިވެއްޖެއެވެ.
މި އެކްސްޕޯ ބާއްވާފައިވަނީ ބެލްޖިއަމްގެ ބުރަސަލްސްގައި މިމަހު 7 އިން 9 އަށެވެ. މި އެކްސްޕޯގައި ރާއްޖޭގެ ފަރާތުން 11 ކުންފުންޏެއް ބައިވެރިވިއެވެ. މިފްކޯގެ ފަރާތުން ބައިވެރިވެ ވަޑައިންނެވި ޓީމުގައި އިސްކޮށް ހުންނެވީ ސީއީއޯ އިސްމާޢީލް ފައުޒީ އެވެ.ބަޔަރުން ހޯދައި މަހުގެ އުފެއްދުންތަކަށް ރަނގަޅު އަގުހޯދުމާއި މަހުގެ ވިޔަފާރި ފުޅާކޮށް އިސްތިހާރު ކުރުމާއި ވަސީލަތްތައް އެހެން ޤައުމުތަކަށް އިސްތިހާރު ކުރުން ފަދަ ކަންތައްތައް މި އެކްސްޕޯގައި އޮންނާނެއެވެ.
ރާއްޖޭގެ މަހުގެ އުފެއްދުންތައް މިހާރަށްވުރެ ބޮޑަށް މާކެޓުކޮށް ހަމަ އަގު ހޯދުމަށް މިފަދަ ފެއާތަކުގައި ބައިވެރިވެގެން މަސައްކަތް ކުރައްވަމުން ގެންދަވާ ކަމަށާއި އެކަމުގެ އެދެވޭ ނަތީޖާ ވެސް ފެންނަމުންދާ ކަމަށް މިފްކޯގެ ސީއީއޯ އިސްމާޢީލް ފައުޒީ ވިދާޅުވެފައިވެއެވެ.
ބުރަސަލްސްގައި ކުރިއަށްދާ ފެއާގައި ދުނިޔޭގެ އެކި ހިސާބުތަކުން ނަވާރަސަތޭކައަށް ވުރެ ގިނަ ފަރާތްތަކުން ބައިވެރިވެއެވެ.
