ސައުދިއަރަބިޔާގެ ސަރުކާރުން ދިވެހިރާއްޖެއަށް 50 ޓަނުގެ ކަދުރު މިއަދު ދީފިއެވެ.
ސައުދީ ސަރުކާރުން ރާއްޖެއަށް ދިން މި ކަދުރު ރާއްޖޭގެ ސަރުކާރާއި ހަވާލުކުރުން އޮތީ މާލޭގައި ހުންނަ ސައުދީ އެމްބަސީގައި މިއަދު ހެނދުނު ބޭއްވި ރަސްމިއްޔާތެއްގައި އެވެ. ރާއްޖޭގެ ފަރާތުން ކަދުރާއި ހަވާލުވެވަޑައިގަތީ އިސްލާމިކް މިނިސްޓަރު ޑރ. އަހްމަދު ޒާހިރެވެ.
މިއަދު ހެނދުނު ސައުދީ އެމްބަސީ ގައި ބޭއްވި މި ރަސްމިއްޔާގަތުއި ސައުދީގެ ފަރާތުން ރާއްޖެއާ ކަދުރު ހަވާލުކުރެއްވީ ސައުދީ އެމްބަސީގެ ޗާޖް ޑި އެފެއާޒް މެތުރިކް އަލް ދޮސާރި އެވެ.
މި ރަސްމިއްޔާގަތުއި އިސްލާމިކް މިނިސްޓަރު ޒާހިރު ވިދާޅުވީ، ރޯދަ މަސް ފެށުމުގެ ކުރިން ސައުދީ ކަދުރު ބަހާނެ ކަމަށާއި ނަމަވެސް ސައުދީގެ 50 ޓަނުގެ ކަދުރު ރާއްޖޭގެ ހުރިހާ ރައްޔިތުންނަށް ބެހޭ ވަރު ނުވާނެ ކަމަށެވެ. ކަދުރު ބަހާނެ ގޮތުގެ ތަފްސީލެއް މިނިސްޓަރު ނުދެއްވަ އެވެ. މިދިޔަ އަހަރު ސައުދީން ދިން ކަދުރުތަށް ބަހައިފައިވަނީ، ކައުންސިލްތަކާއި ހަވާލު ކޮށްގެންނެވެ.
ޒާހިރު ވިދާޅުވީ، އެހެން އަމިއްލަ ބައެއް ފަރާތްތަކުން އިތުރު ކަދުރު ހަދިޔާ ކުރާނެ ކަމަށް އުއްމީދު ކުރައްވާ ކަމަށާއި ހަދިޔާގެ ގޮތުގައި ލިބޭ ކަދުރުވެސް ވީހާ އަވަހަކަށް ބަހާނެ ކަމަށެވެ.
ރާއްޖޭގައި ބައެއް އަމިއްލަ ފަރާތްތަކާއި ޖަމިއްޔާ ޖަމާއަތްތަކުން ވެސް ރޯދަ މަހާއި ދިމާކޮށް ކަދުރު ބަހައެވެ.
