ބިންވެރިޔާ އަދި ގެދޮރުވެރިޔާ ސްކީމްގެެ ދަށުން ފުލެޓާއި ގޯތި ލިބޭނެކަމަށް ބުނެ ސްކޭމެއް ހިންގަމުންދާތީ ސަމާލުވުމަށް ހައުސިން މިނިސްޓްރީއިން އެދިއްޖެއެވެ.
ހައުސިން މިނިސްޓްރީއިން ނެރުނު ނޫސްބަޔާނެއްގައި ވަނީ ބިންވެރިޔާ އަދި ގެދޮރުވެރިޔާ ސްކީމްގެެ ދަށުން ފުލެޓާއި ގޯތި ލިބޭނެކަމަށް ބުނެ އެކި ފަރާތްތަކުން އާންމުންގެ އަތުން ފައިސާ ނަގަމުންދާ ކަމުގެ މައުލޫމާތު ލިބިފައިވާ ކަމަށެވެ.
ގޯއްޗާއި ފުލެޓު ދިނުމުގެ އެންމެހައި މަސައްކަތްތައް ކުރިއަށް ގެންދާނީ ދިވެހި ސަރުކާރުގެ ގެޒެޓުގައި ޝާއިއުކޮށް އާންމުކޮށްފައިވާ އުސޫލުތަކާ އެއްގޮތަށްކަމަށް މިނިސްޓްރީން ވަނީ ބުނެފައެވެ. އެގޮތުން ގެޒެޓްގައި އާންމުކޮށްފައިވާ އުސޫލަކާއި ނުވަތަ އާންމުކޮށްފައިވާ އިއުލާނަކާ ހިލާފަށް އެއްވެސް ފަރާތަކަށް ސަރުކާރުގެ ބޯހިޔާވެހިކަމުގެ އެއްވެސް މަޝްރޫއަކުން ގޯއްޗާއި ފްލެޓް ލިބުމުގެ ފުރުސަތު ނޯންނާނެ ކަމަށް އެ މިނިސްޓްރީން ވަނީ ބުނެފައެވެ.
ސަރުކާރުން ހިންގާ ޕްރޮގްރާމެއްގެ ދަށުން ދޫކުރާ ގޯތި ނުވަތަ ފްލެޓް ހޯދުމުގެ ގޮތުން އެއްވެސް ފަރާތަކާ ފައިސާގެ ނުވަތަ އެފަދަ އެހެން މުއާމަލާތެއްވެސް ނުކުރުމަށް މިނިސްޓްރީން ވަނީ އިލްތިމާސްކޮށްފައެވެ.
