ހއ. އަތޮޅު އިންނަފިނޮޅު ފަރަށް އެރުމުން އަންދާލަން މަސައްކަތްކުރި ބޯޓުގައި ހުރި ކަމަށް ބެލެވޭ މަސްތުވާތަކެތި އެއަތޮޅުގެ ބައެއް ރަށްތަކަށް ލައްގަން ފަށައިފިއެވެ.
މޮޅަދޫއާއި އުލިގަމަށް މަސްތުވާތަކެތި ކަމަށް ލަފާކުރެވޭ އެއްޗެހިތަކެއް ލައްގާފައި ވާ އިރު، އެތަކެތި މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
ބުރާސްފަތި ދުވަހުގެ ހެނދުނު އިންނަފިނޮޅު ފަރަށް އެރީ އިރާނުގެ ބޯޓެއްކަން އެނގިފައިވެއެވެ. އަދި އޭގައި ތިބީ އިރާނަށް ނިސްބަތްވާ އަށް ފަޅުވެރިއެކެވެ. އަދި ކޯސްޓްގާޑުން އެސަރަހައްދަށް ގޮސް، ބޯޓާ ގާތްވުމުން އޭގައި ތިބި ފަޅުވެރިން، ވަނީ ބޯޓުގައި ރޯކޮށްލުމަށްފަހު ކަނޑަށް ފުންމާލާފައެވެ. ނަމަވެސް ބޯޓު އެކީގައި އަނދައިގެން ނުދާ ކަަމަށް މައުލޫމާތު ލިބެއެވެ.
ފުލުހުންގެ މީޑިއާ އޮފިޝަލް ވިދާޅުވީ ފަރަށް އެރުމުން އަންދާލި ބޯޓުގައި މަސްތުވާތަކެތި ކަމަށް ޝައްކު ކުރެވޭ އެއްޗެހިތަކެއް ހުރިކަމުގެ ނިޝާންތަކެއް ފެންނާތީ ފުލުހުން ދަނީ ބޯޓު ބަލައިފާސްކުރަމުން ކަމަށާއި އިތުރު މައުލޫމާތެއް މިވަގުތު ހާމަކުރެވެން ނެތް ކަމަށެވެ.
