އައްޑޫ ސިޓީގެ ހިތަދޫގައި މޫދަށް އެރި އުޅެނިކޮށް މި މަހުގެ 21 ވަނަ ދުވަހު ގެއްލުނު ދެކުދިންގެ ތެރެއިން ހިތަދޫ، ޗަނބޭލީގެ، އަލީ ފަހުމީ ލައިގެން ހުރި ކަމަށް ބެލެވޭ ސޯޓު ފެނިއްޖެއެވެ.
ސޯޓު ފެނިފައިވަނީ ހިތަދޫގައި ހުންނަ ފްލެޓްތަކާއި ދިމާއިން ފުއްޓަރު ފަރާތު ފަރުމަތިންނެވެ. ސޯޓު ފެނުނީ ފުލުހުންގެ ޓީމަކަށް ކަމަށާއި އެ ސޯޓު ފެނިފައިވަނީ މިއަދު ހެނދުނެއްގެ ވަގުތެއްގައި ކަމަށް މައުލޫމާތު ލިބެއެވެ.
މިމަހުގެ 21 ވަނަ ދުވަހު، ހިތަދޫ ހޮސްޕިޓަލާ ދިމާލުން ފުއްޓަރު ފަރާތަށް ފައިބާ އުޅެނިކޮށް ގެއްލުނީ ސ ހިތަދޫ، ޗަނބޭލީގޭ އަލީ ފަހުމީއާއި ހިތަދޫ ޓޮޕާޒް، މަޔާމީން އަލީއެވެ.
މި ހާދިސާގައި އެކުދިންނާ އެކު އުޅުނު ހިތަދޫ ބްލޫގޭ އުމުރުން 16 އަހަރުގެ އަލީ ރާއިފްވަނީ ސަލާމަތް ވެފައެވެ. އޭނާ ސަލާމަތްކޮށްފައިވަނީ އެ ވަގުތު އެތަނުގައި ހުރި ހާއްސަ އެހީއަށް ބޭނުންވާ މީހެކެވެ..
