ދަރިފުޅާއެވެ! އެންމެ ފުރަތަމަ މި ލޮލަށް ތި ތުއްތު ދަރިފުޅު ފެނުނު އިރުވެސް އޮތީ މަޑު ހިނިތުންވުމެއްގައެވެ. އާންމުކޮށް ދުނިޔެއަށް އަންނަ އިރު ކުދިން ތިބޭ ވަރަށް ވުރެ ދަރިފުޅު މާ ކުޑައެވެ. އެހެން ނަމަވެސް ދަރިފުޅުގެ ފުރަތަމަ ފެނިލުން މި މަންމައަށް ލިބުނު ހިތްހަމަ ޖެހުން ދަރިފުޅަށް ބުނެދޭނީ ކިހިނަކުން ހެއްޔެވެ. ﷲ އަށް ޝުކުރު ކުރީމެވެ. ދަރިފުޅު މި މަންމަ އަށް ލިބުނީތީ ނުހަނު އުފާ ކުރީމެވެ. މަންމަ އެދުވަހު ކުރި އިޙުސާސްތައް ދަރިފުޅަށް ބުނެދޭނެ ގޮތެއް ނޭނގެއެވެ. ދަރިފުޅާއެވެ! އެއީ ތަފާތު އިޙުސާސް ތަކެކެވެ. މިއަދު މަންމަ ކިތަންމެ ބުނެދިނަސް އެ ހިތްހަމަ ޖެހުމުގެ މިންވަރު ނަގައިގަންނަން ދަރިފުޅަށް ނޭނގޭނެއެވެ. އެއީ މައިވަންތަކަމުގެ ލޯތްބެވެ.
ދަރިފުޅަށް ބޭނުންވި ކޮންމެ ކަމެއް މަންމަ އާއި ބައްޕަ ކޮށްދެމުން ދިޔައީ ނުހަނު އުފަލުންނެވެ. ދަރިފުޅު ރޯ އަޑު އިވުނަސް ހިތަށް ތަދުވެއެވެ. ކުޑަކުޑަ ތުންފަތުން ހިނިތުންވުން ފެންނަ ކޮންމެ ވަގުތަކު ބޭއިޚްތިޔާރުގައި މަންމަ އަށްވެސް ހިނިތުންވެވެއެވެ. ނިންދަވައިގެން ފިރުމަން ތި ލޯބި ތުއްތު މޫނަށް ބަލަން އިނދެވުނީ ކިތައް ދުވަހު ކަމެއް ޚުދު މަންމަ ވެސް ހަނދާނެއް ނެތެވެ. މި މަންމަގެ ދިރިއުޅުން އެއްކޮށް ދަރިފުޅު ބަދަލު ކުރިއެވެ. މަންމަ ކުރާ ކޮންމެ ކަމެއް ކުރަމުން ދިޔައީ ދަރިފުޅަށް ޓަކައެވެ.
އެންމެ ފުރަތަމަ ދަރިފުޅު މަންމަ ކިޔާ ގޮވާލި ދުވަސް މަތިން މަންމަ ދުވަހަކުވެސް ހަނދާނެއް ނުނެތޭނެއެވެ. “މަންމީ” މިޖުމްލަ އަދިވެސް މަންމަގެ ކަންފަތް ތެރޭގައި ގުގުމާލާ ކަހަލައެވެ.ދަރިފުޅާއެވެ! އެންމެ 8 މަހުގައި ދަރިފުޅުގެ ކުޑަ ކުޑަ ފައިން ކުރު ފިޔަވަޅުތަކެއްގައި ހިނގަން ފެށި ދުވަސް އެއީ ހާދަ ހިތަށް ފަސޭހަ ކަމެއް ގެނުވި ދުވަހެކެވެ. މަންމަގެ އިނގިލީގައި ހިފައިގެން ހިނގަންދާ ވަގުތު ތަކުގައި ދަރިފުޅުގެ ފައި އަރިއަޅާލަފާނެތީ މަންމަ ސަމާލުވީމެވެ. ދަރިފުޅުގެ ފިޔަވަޅު އަޅާ ކޮންމެ ދިމާލެއް ސާފު ކުރަމުން ދިޔައިމެވެ. އެއީ ދަރިފުޅުގެ ލޯބި ފައިގަ އެއްވެސް ގާ ކޮޅެއް ޖެހިދާނެތީއެވެ. ކޫރުމެއް އެޅުނަސް މި މަންމަގެ ހިތަކަށް ކެތެއް ނުވާނެތީއެވެ.
ދަރިފުޅާއެވެ! ދަރިފުޅު އެންމެ ފުރަތަމަ ސްކޫލަށް ދިޔަ ދުވަސް މަތިން ހަނދާން އެބަހުރި ހެއްޔެވެ. ދަރިފުޅު ކުޑަ ކަމުން ހަނދާން ނެތަސް މަންމަ ވަރަށް ރަނގަޅަށް ހަނދާން އެބަހުއްޓެވެ. އެ ދުވަހު މަންމައާއި ބައްޕަ ދަރިފުޅު ގޮވައިގެން ސްކޫލަށް ދިޔަ އިރު ބައްޕަ ކިތަންމެ ހަމަޖެހިފައި ހުއްޓަސް މަންމަގެ ހިތް އޮތީ ތެޅިތެޅިއެވެ.ސްކޫލަށް ވަދެގެން ދިޔައިރު ބައެއް ކުދިންގެ ރުއިމުގެ އަޑު އިވެމުން ދިޔައެވެ. ސްކޫލްގައި ބަހައްޓާފައި ދާން އުޅުމުން މަންމައިންގެ ފަސްބައިގާ ހިފާ ރޮމުން ދިޔަ މަންޒަރުން ހިތްހަލާކުވާ ވަރުވިއެވެ. އެވަގުތު މަންމަ ދަރިފުޅުގެ މޫނަށް ބެލީމެވެ. ދަރިފުޅުގެ މޫނުމަތިން ފެނިގެން ދިޔައީ ހިތްހަމަޖެހުމެވެ. ދަރިފުޅު ކްލާހަށް ވެއްދުމުން ކަންތައް ކުރާނެ ގޮތަކާއިމެދު ވިސްނަމުން މަންމަ ދިޔައިރު މަންމަގެ ހިނގުން ވެސް ލަސްވިއެވެ. ކްލާހަށް ވެއްދުމަށްފަހު ބަސްއަހައިގެން އާންޓީ ބުނާ ގޮތަށް ހަދަން ނަސޭޙަތް ދީފަ ދާން ފެށުމުން “ލައްބަ މަންމީ” ބުނެފަ އާންޓީގެ އަތުގައި ހިފައިގެން ނުހަނު ބަސްއަހާ ކުއްޖެއް ފަދައިން ދިޔަ މަންޒަރުން މަންމަ ހާދަ އުފާވިއެވެ.
ޕްރީ ސްކޫލުން ފެށިގެން ދަރިފުޅު މިއަދު ސާނަވީ ނިންމުމާ ގާތަށް ޖެހިލިއިރު ސްކޫލް ދައުރުގައި ހޭދަވީ ކޮންމެ ދުވަހަކީ ވަރަށް ހިތްގައިމު ދުވަހެކެވެ. ބައިވެރިވާ ކޮންމެ މުބާރާތަކުން ނަގަމުން ދިޔަ ވަނަތަކާއި ﷲގެ އިރާދަ ފުޅުން ހޯދަމުންދިޔަ ކާމިޔާބު ތަކަކީ މަންމަ އިންތިހާއަށް ފަޚުރުވެރި ކުރުވި ކާމިޔާބީ ތަކެއްކަން ކަށަވަރެވެ. ދަރިފުޅަކީ ކިޔަމަންތެރި އަޚުލާޤް ރަނގަޅު ކުއްޖެއް ކަމަށް މުދައްރިސުން ބުނާ ކޮންމެ ފަހަރަކު ހާދަ އުފާވެއެވެ. ﷲ އަށް ޙަމްދު ހުއްޓެވެ.މެދު އުޑުގައި ދަރިފުޅު ފިޔަ ޖަހާ މަންޒަރު އެއީ މަންމަ އަބަދުވެސް ދެކެން ބޭނުން މަންޒަރެވެ.ދަރިފުޅާއެވެ! ތިޔަ ބެބުޅުން ފަނޑުވިޔަ ނުދެއްޗެވެ.
ދަރިފުޅާއެވެ! މިއަދު ތިއީ ފުރާވަރަށް އަރަމުންދާ އަންހެން ކުއްޖެކެވެ. ދަރިފުޅަކީ މަންމަގެ ލޮލުގެ ނޫރެވެ. މަންމަގެ ފެނުމަށް ފުސްކަމެއް ނުގެނުވައްޗެވެ. ދަރިފުޅާއެވެ! ތިޔައީ މަންމަގެ ހިތުގެ ވިންދެވެ. މަންމަގެ ހިތް ހުއްޓުނަ ނުދެއްޗެވެ.
އަބަދުވެސް މަންމަ ދޭ ނަސޭޙަތް އަޑުއަހާ ކިޔަމަންވަމުން އަންނަ ތި ދަރިފުޅު މުސްތަޤްބަލްގައިވެސް އެކަން އެގޮތަށް ދަމަހައްޓައްޗެވެ. ފަސް ނަމާދަށް ރައްކާތެރިވާށެވެ. ކީރިތި ޤުރުއާން ފޮތަކީ އެންމެ ކިޔާ ހިތްވާ ފޮތަށް ހަދާށެވެ. ދީނުގައި އަންގަވާފައިވާ ކަންތައް އަބަދުވެސް އަދާކުރާ ކުއްޖެއް ކަމުގައި ވާށެވެ. ނަހީތަކަށް އަރައިނުގަންނައްޗެވެ.
ދަރިފުޅަކީ މި ހުރިހާ ކަންތައް މިހާރުވެސް ކުރާ ކުއްޖެކެވެ. އަބަދުވެސް ދަރިފުޅަށް ހަނދާންކޮށް ދެމުން ދިޔުމަކީ މަންމަގެ ވާޖިބެކެވެ. ޢަމަލު ސީދާކޮށް ބެހެއްޓުމަކީ ދަރިފުޅުގެ ވާޖިބެވެ. ދަރިފުޅާއެވެ! އަބުރުވެރި ކުއްޖެއްގެ ގޮތުގައި ޙަޔާތް ހޭދަކުރާ ކުއްޖަކަށް ވައްޗެވެ. މަންމަ އަކީ އަބަދު ދުނިޔޭގައި ހުންނާނެ މީހެއް ނޫނެވެ. މަންމަ ނެތަސް މަންމަ ދޭ ނަސޭޙަތް ހަނދާން ނައްތާނުލައްޗެވެ. އަބަދުވެސް މާތްﷲގެ މަގުގައި ފައިތިލަ ފުރިހަމައަށް ސާބިތުކޮށްގެން ހުންނަ ކުއްޖަކަށް ވައްޗެވެ.
ލޯބިވާ ދަރިފުޅާއެވެ! މަންމަ ދަރިފުޅު ދެކެ އިންތިހާއަށް ލޯބިވަމެވެ.
