ހަތަރު އަހަރުގެ އަންހެން ކުއްޖަކު އިންޑިއާގެ މަހާރާޝްތްރާގެ ތާނޭގައި ވަރަށް އަނިޔާވެރި ގޮތަކަށް މަރާލާފައި އޮއްވާ ފެނިއްޖެއެވެ.
ގޯތަމް ނަގަރް ޗޯލްގައި ދިރިއުޅެމުންދިޔަ ޕާޔަލް ޕްރަސާދް ނަމަކަށް ކިޔާ މިކުއްޖާ މިދިޔަ އަންގާރަ ދުވަހުގެ ހަވީރު އެކުއްޖާގެ އެއްބަނޑު އެއްބަފާ ބޭބޭ އާއިއެކު ރައްޓެހިން ގާތަށް ކުޅެންދިޔަކަމަށް ވެއެވެ. ކުއްޖާގެ ބޭބެ އެނބުރި ގެޔަށް ދިޔައީ އެކުވެރިންނާއި އެކު ކުޅެން ޕާޔަލް ބަހައްޓާފައި ކަމަށް އާއިލާއިން ބުނެފައިވާ ކަމަށް އިންޑިއާގެ ނޫސްތަކުން މަޢުލޫމާތު ދެއެވެ. އިރު އޮއްސިގެން ގެއަށް ނައިސްގެން ލަސްވެގެން އާއިލާ އަދި އަވައްޓެރިން ޕާޔަލް ހޯދަން ނިކުމެ ނުފެނިގެން ބުދަ ދުވަހު ޕޮލިހުންގެ އެހީތެރިކަމަށް އެދުނީ ކަމަށް ވެސް އާއިލާއިން ބުނެއެވެ.
ޕޮލިހުން ޕާޔަލް ހޯދުމަށް ކުރި މަސައްކަތުން އޭނާގެ ފުރާނަ ނެތް ހަށިގަނޑު ފެނިފައިވަނީ އޭނާ ދިރިއުޅޭ ގެއާއި 300 މީޓަރު ދުރުން ވަލުތެރޭގައި އޮއްވާ ކަމަށް ފުލުހުން މަޢުލޫމާތު ދެއެވެ. ޕާޔަލްގެ ހަށިގަނޑު ފެނުނު އިރު އޭނާގެ ދެ އަތްވެސް ވަނީ ކަނޑާލާފައެވެ. މީގެ އިތުރުން ބުރަކައްޓާއި ކަރުގައި ޒަޚަމްތަކެއް ހުރިކަމަށް ވެސް ފުލުހުން މައުލޫމާތު ދެއެވެ. އެ ތުއްތު އަންހެން ކުއްޖާގެ ބޯ ވެސް ބާލާފައިވާ ކަމަށް ނޫސްތަކުން މައުލޫމާތު ދެއެވެ.
ޕާޔަލްގެ ހަށިގަނޑު މިހާރު ވަނީ ޕޯސްޓްމޯޓަމް ހެދުމަށްޓަކައި ފޮނުވިފައެވެ. އޭނާގެ ބައްޕަ މަހާދޭވް ބުނެފައިވަނީ އެއްވެސް ވަރަކަށް އޭނާގެ ދަރިފުޅު މަރާލި މީހަކު ނޭނގޭ ކަމަށެވެ. އެމީހުންގެ އެއްވެސް ދުޝްމަނުންނެއް ނޫޅޭ ކަމަށްވެސް މަހާދޭވް ބުނެފައިވެއެވެ.
މި ހާދިސާ އާއި ގުޅިގެން ބޮއިވާޑާ ޕޮލިސް ސްޓޭޝަންގެ އިންސްޕެކްޓަރު ވިޖޭ ބުނެފައިވަނީ އެއީ އިންސާނުން ޤުރުބާން ކުރުމުގެ އަމަލެއް ކަމަށް ބެލެވޭ ކަމަށެވެ. އެހެން ކަމުން އެ އަމަލު ހިންގި ފަރާތެއް ހޯދުމުގެ މަސައްކަތް ފަށާފައިވާ ކަމަށެވެ.
