ފުލުހުން ހިންގި އޮޕަރޭޝަނެއްގައި މާފުށީ ޖަލަށް އެތެރެކުރުމަށް ތައްޔާރުކޮށްފައިހުރި ގިނަ ޢަދަދެއްގެ ތަކެތި ހޯދައި، އެތަކެތި ފުލުހުންގެ ބެލުމުގެ ދަށަށް ގެނެސްފިއެވެ.
ކ. ގުރައިދޫގެ ގެއެއްގައި މާފުށީ ޖަލަށް އެތެރެކުރުމަށް ތައްޔާރުކޮށްފައިހުރި ގިނަ ޢަދަދެއްގެ ތަކެތިހުރިކަމުގެ މަޢުލޫމާތު ފުލުހުންނަށް ލިބުމާއި ގުޅިގެން އޭޕްރީލް 4 ވަނަ ދުވަހު ހިންގި އޮޕަރޭޝަނުގައި އެގެ ބަލާ ފާސް ކޮށްފައިވެއެވެ. ފާސް ކުރެވުނު ގޭ ތެރެއިން އެ ތަކެތި ފެނިފައިވާ ކަމަށާއި މިހާރު އެ ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ހާމަކޮށްފައިވެއެވެ.
ފުލުހުން ހިންގި މި އޮޕަރޭޝަނުގައި އެގެބަލައިފާސްކުރިއިރު އެގޭ ކޮޓަރިއެއްގެ ތެރެއިން ފެނުނު ތަކެތީގެ ތެރޭގައި 22 މޯބައިލް ފޯނާއި މޯބައިލް ފޯނުގެ 29 ޗާޖަރާއި މީޑިއާ ޕްލެޔަރުގެ އިތުރުން ދެ ރިމޯޓާއި ކޭބަލް ތަކަކާއި 5 ސިމްކާޑު ފެނިފައިވާ ކަމަށް ފުލުހުން ވިދާޅުވެފައިވެއެވެ.
މިމައްސަލައާ ގުޅިގެން މީހަކު ހައްޔަރުކޮށްފައި ނުވާ ކަމަށާއި ގުރައިދޫ ޕޮލިސް ސްޓޭޝަނުން މި މައްސަލަ ތަޙުޤީޤު ކުރަމުންދާ ކަމަށް ފުލުހުން ބުނެފައިވެއެވެ.
