100 ޑޮލަރުގެ ބިޑަކުން ފަށައި، ކުރީގެ ރައީސް މުހައްމަދު ނަޝީދު ވިއްކާލަން އީބޭގައި ޖަހައިފިއެވެ.
އޮންލައިން ކޮށް މުދާ ގަނެ ވިއްކުމަށް ބޭނުން ކުރާ މަޝްހޫރު ވެބްސައިޓް އީބޭގައި ނަޝީދު ވިއްކަން ޖަހާފައި ވަނީ ރޭގެ ވަގުތެއްގައެވެ. ނަމަވެސް ދެގަޑިއިރެއް ހާއިރު ތެރޭގައި ވަނީ އެޕޯސްޓް ރިމޫވް ކޮށްފައެވެ.
ރައީސް ނަޝީދު ވިއްކާލަން އީބޭގައި ޖެހި ޕޯސްޓް ރިމޫވް ކުރީ ރައީސް ނަޝީދު ވިއްކާލަން އުޅުނު ފަރާތުން ކަމެއް ނުވަތަ އީބޭ އިން ކަމެއް ސާފެއް ނުވެއެވެ.
ރިމޫވް ކުރިއިރު 100 ޑޮލަރުން ފެށި ބިޑު ވަނީ 200 އެމެރިކާ ޑޮލަރަށް އަރާފައެވެ.
އީބޭގައި ބުނެފައި ވަނީ “ބޭނުމެއް ނުހިފޭ ދިވެހިރާއްޖޭގެ ކުރީގެ ރައީސް ނަޝީދު” ވިއްކާލަން ބޭނުންވާ ކަމަށެވެ. ނަޝީދުގެ ހާލަތު ބަޔާން ކުރަމުން އެޕޯސްޓްގައި ބުނެފައި ވަނީ އެއީ ބަލާބެލުމަށް ވަރަށް އާ ނަމަވެސް ބޭނުން ކޮށްފައިވާ އުފެއްދުމެއް ކަމަށެވެ.
މީގެ ކުރިން ވެސް އެކި ގައުމުތަކުގެ ވެރިން ވިއްކާލަން އީބޭގައި ޖަހާފައި ވެއެވެ.
