މިދިޔަ މަހުގެ 24 ވަނަ ދުވަހު މަރުވި ބޮލީވުޑްގެ ފުރަތަމަ އަންހެން ސުޕަސްޓާރ ސްރީދޭވީގެ ދޮށީ ދަރިފުޅު ޖާންވީ ކަޕޫރްގެ 21 ވަނަ އުފަން ދުވަސް ފާހަގަކޮށްފިއެވެ.
ސްރީދޭވީގެ މަރުގެ ހިތާމަ މުޅި ބޮލީވުޑާއި އާއިލާއިން ކުރަމުންދާއިރު ޖާންވީގެ އުފަންދުވަހު އޭނާވަނީ އުމުރުންދުވަސްވީ މީހުން ދިރިއުޅޭ ގެއެއްގައި އުފަންދުވަސް ކުޑަގޮތަކަށް ފާހަގަކޮށްފައެވެ. ސޯޝަލް މީޑިއާގައި ދައުރުވަމުންދާ ފޮޓޯތަކުން ޖާންވީގެ ހިތާމަތައް މޫނުމަތިން ފެންނަން ހުރި އިރު އުފަންދުވަހުގެ ކޭކް ފެޅުމުގެ ކުރިން ޖާންވީ ލޯމަރާލާ މަންޒަރުން ގިނަ ބައެއްގެ ހިތްވަނީ ކުދިކުދިވެފައެވެ. ޖާންވީގެ ހިތާމަވެރި ތަސްވީރުތައް ފެނުމުން އަދިވެސް މަންމަ ސްރީދޭވީގެ ވަކިވުން އޭނާއަށް ގަބޫލުނުކުރެވޭ ކަމުގައި ގިނަ ބަޔަކުވަނީ ބުނެފައެވެ
ޖާންވީގެ 21 ވަނަ އުފަން ދުވަހަށް ސްރީދޭވީ ގިނަ ކަންތައްތަކެއް ރާވާފައިވާއިރު އެކަންތަކާއި ބެހޭ ގޮތުން ބޯނީ ކަޕޫރް އާއި މަޝްވަރާކޮށްފައިވާކަމަށް އާއިލާގެ ގާތް ފަރާތަކުންވަނީ ބުނެފައެވެ. “ސްރީދޭވީ އާއި ބޯނީ ވަނީ ޖާންވީގެ އުފަންދުވަސް ކުލަގަދަކޮށް މުޅި އާއިލާއާއި އެކީ ފާހަގަކުރުމަށް ނިންމާފަ. އެކަމަކު އެއްވެސް މީހަކަށް ތަގްދީރެއް ނޭގޭނެ.މީ ކުޑަކުޑަ ޖާންވީ އަށް ވަރަށް އުދަގޫ ވަގުތެއް.” އެ ފަރާތުން ބުނެފައިވެއެވެ. މީގެ އިތުރުން އެ ފަރާތުން ބުނެފައިވަނީ ސްރީދޭވީ ނެތުމުގެ ހިތާމަ މިއަދު ޖާންވީ ކުރަން އޭނާގެ އާއިލާއިން ބޭނުން ނުވާކަމަށާއި އެހެންކަމުން އަރްޖުން އާއި އަންޝުލާ ކަޕޫރްވެސް ޖާންވީގެ އުފަންދުވަހުގެ ހާއްސަ ހަފްލާގައި ބައިވެރިވާން ނިންމާފައިވާކަމަށެވެ
މީގެ އިތުރުން ޖާންވީ ވަނީ ޖަހާން ކަޕޫރް އާއި، ޝަނާޔާ ކަޕޫރް، އަންޝުލާ ކަޕޫރް. ސޯނަމް ކަޕޫރް އަދި ރިއާ ކަޕޫރް އާއި އެކު އެމީހުން ދިރިއުޅޭ ގޭގައި އުފަން ދުވަސް ކުޑަގޮތަކަށް ފާހަގަކޮށްފައެވެ.ޖާންވީ އުފަން ދުވަހުގެ ކޭކް ފެޅުމުގައި ހުޝީ ކަޕޫރް އާއި ބޯނީ ކަޕޫރްވެސް ވަނީ ބައިވެރިވެފައެވެ
