އިލެކްޝަންސް ކޮމިޝަންސް (އީސީ) ގެ މެންބަރު ކަމަށް ތ. ތިމަރަފުށި، މާލޭގެ އަހުމަދު ޝަރީފް އާދަމް އައްޔަން ކުރުމުގެ މައްސަލަ ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއަށް މިއަދު ފޮނުވައިފި އެވެ
ރައިސުލްޖުމްހޫރިއްޔާ މަޖިލީހަށް ފޮނުއްވި ސިޓީގައި ވަނީ އީސީގެ މެންބަރުކަމަށް ކުރިމަތިލުމަށް ހުޅުވާލުމުން އެ މަގާމަށް އެދި ކުރިމަތިލެއްވި ބޭފުޅުންގެ ތެރެއިން އެމަނިކުފާނު އަށް ފެނިވަޑައިގަންނަވާ ބޭފުޅަކީ ޝަރީފްކަމުގައި ވިދާޅުވެފައެވެ.އެހެންކަމުން މިއަދުގެ ޖަލްސާގައި ޝަރީފްގެ ނަން އިއްވުމަށް ފަހު އެ ނަން ދިރާސާ ކުރުމަށް ކޮމެޓީއަށް ފޮނުވުމަށްފަހު އެ ހިސާބުން މިއަދުގެ ޖަލްސާ ވަނީ ނިންމާލާފަ އެވެ
މިހާރު ފެނަކަ ކޯޕަރޭޝަންގެ މެނޭޖިން ޑިރެކްޓަރު ކަމުގެ މަގާމުގައި ހުންނެވި ޝަރީފު އަކީ މީގެ ކުރިން އިލެކްޝަންސް ކޮމިޝަނުގެ ސެކްރެޓަރީ ޖެނަރަލްގެ މަގާމް ވެސް އަދާކުރެއްވި ބޭފުޅެކެވެ. މީގެ އިތުރުން ޝަރީފް ވަނީ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރުކަންވެސް ކުރައްވާފައެވެ
