ރައްކާތެރި ގޮތުގައި ކުނި މެނޭޖްކުރުމަށް ސަރުކާރުން ހިންގާ މަޝްރޫޢުގެ ދަށުން، އައްޑޫ ސިޓީގައި ޤާއިމްކުރުމަށް ހަމަޖެހިފައިވާ ރީޖަނަލް ވޭސްޓް މެނޭޖްމަންޓް ސިސްޓަމަށް ބޭނުންވާ އީއައިއޭ ހެދުމަށް، ސީޑީއީ ޕްރައިވެޓް ލިމިޓެޑާ ޙަވާލުކޮށްފިއެވެ.
އެ މަސައްކަތް ހަވާލުކޮށްފައިވަނީ ސީޑީއީ ޕްރައިވެޓް ލިމިޓެޑާ އެވެ. އެ މަސައްކަތް ހަވާލުކުރުމުގެ އެއްބަސްވުމުގައި އެކުންފުންޏާއި ސަރުކާރާ ދެމެދު ސޮއި ކުރައްވައިފައިވަނީ މި މަހުގެ 20 ވަނަ ދުވަހުގައެވެ.
އެންވަޔަރަންމެންޓް މިނިސްޓްރީގައި ބޭއްވި ރަސްމިއްޔާތުގައި ސަރުކާރުން ފަރާތުން އެއްބަސްވުމުގައި ސޮއިކުރެއްވީ އެންވަޔަރަންމެންޓް މިނިސްޓަރ ތާރިގު އިބްރާހީމެވެ. ސީޑީއާ ޕްރައިވެޓް ލިމިޓެޑުގެ ފަރާތުން ސޮއިކުރެއްވީ އެކުންފުނީގެ ސީއީއޯ ޑރ. އަހުމަދު ޝާރިގެވެ.
ހަތަރު މަސް ދުވަހުގެ ތެރޭގައި މަސައްކަތް ނިންމާ ގޮތަށް ހަވާލުކުރި މިމަސައްކަތަށް ތިންލައްކަ ސައުވީސް ހާހަށްވުރެ ގިނަ ރުފިޔާ ޚަރަދުވާނެކަމަށް އެންވަޔަރަންމެންޓް މިނިސްޓްރީންބުނެއެވެ.
މި ސިސްޓަމް އައްޑޫސިޓީގައި ގާއިމް ކުރުމުން އައްޑުއާއި، ފުވައްމުލަކާއި، ހުވަދު އޮތޮޅުގެ ކުނި ޖަމާކުރާނީ އެ ތަނަށެވެ. މައުލޫމާތު ލިބިފައިވާ ގޮތުގައި މި ސިސްޓަމް ގާއިމް ކުރުމަށް ހަމަޖެހިފައިވަނީ އައްޑޫ ސިޓީ ހިތަދޫ ކުނިކޮށި ހުންނަ ސަރަހައްދުގައެވެ.
އައްޑޫސިޓީގެ އިތުރުން ދ.ރިނބިދުއާއި، ފ.މަގޫދޫގައި އައިލަންޑް ވޭސްޓް މެނޭޖްމަންޓް ސެންޓަރު ޤާއިމްކުރުމަށްވެސް ވަނީ ދެކުންފުންޏަކާ ޙަވާލުކޮށްފައެވެ،. ދ.ރިނބިދޫ އައިލަންޑް ވޭސްޓް މެނޭޖްމަންޓް ސެންޓަރު ޤާއިމްކުރުމަށް އެންވަޔަރަމަންޓް މިނިސްޓްރީން ޙަވާލުކޮށްފައިވަނީ އަކުއަރމެރިން ހޮލިޑޭސް ޕްރައިވެޓް ލިމިޓެޑާއެވެ.
މިއީ ސަރުކާރުގެ ޕީއެސްއައިޕީ ބަޖެޓުން އެއްމިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގުމަށް ހަމަޖެހިފައިވާ މަޝްރޫޢެކެވެ. މިކަމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ އެންވަޔަރެންމަންޓް މިނިސްޓަރ ޠާރިޤް އިބްރާހީމެވެ. އަދި އެކުއަރމެރިން ހޮލިޑޭސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ ޢަބްދުއްރަޙުމާން މުޖުތަބާ އާދަމެވެ. މިމަސައްކަތް 120 ދުވަސްތެރޭގައި ނިންމަންޖެހެއެވެ.
ފ.މަގޫދޫގައި އައިލަންޑް ވޭސްޓް މެނޭޖްމަންޓް ސެންޓަރު ޤާއިމްކުރުމަށް ޙަވާލުކޮށްފައިވަނީ ދަންމާނު ކޮމްޕެނީ ޕްރައިވެޓް ލިމިޓެޑާއެވެ. މީވެސް ސަރުކާރުގެ ޕީއެސްއައިޕީ ބަޖެޓްގެ ތެރެއިން އެއްމިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގުމަށް ހަމަޖެހިފައިވާ މަޝްރޫޢެކެވެ. މިމަސައްކަތް 90 ދުވަހުގެތެރޭގައި ނިންމަންޖެހެއެވެ. އެކުންފުނީގެ ފަރާތުން މިއެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ ޢަލީ ސިރާޖެވެ.
