ރާއްޖެ ފެހިކުރުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފައްޓަވާފައިވާ ފަސް މިލިއަން ގަސް އިންދުމުގެ ގައުމީ މަޝްރޫއުގެ ދަށުން، ސްކައުޓުންނަށް ހާއްސަކޮށް “ޓްރީ ގާޑިއަން ބެޖް” މިއަދު ރަސްމީކޮށް ތައާރަފުކޮށްފިއެވެ. ކުޑަކުދިންނާއި ޒުވާނުން ތިމާވެށި ހިމާޔަތްކުރުމަށާއި ގަސް އިންދުމަށް އަހުލުވެރިކުރުމުގެ މަގުސަދުގައި ނެރުނު މި ބެޖު ލޯންޗުކޮށްދެއްވީ އެންވަޔަރަމެންޓް މިނިސްޓަރު އަލީ ޝަރީފެވެ.
މި ހަރަކާތް ކުރިއަށް ގެންދިއުމަށްޓަކައި އެންވަޔަރަމެންޓް މިނިސްޓްރީ އާއި ސްކައުޓް އެސޯސިއޭޝަނާ ދެމެދު ވަނީ ފަހުމުނާމާއެއްގައި ސޮއިކޮށްފައެވެ. އެންވަޔަރަމެންޓް މިނިސްޓްރީގައި ބޭއްވި މި ރަސްމިއްޔާތުގައި މިނިސްޓްރީގެ ފަރާތުން ސޮއިކުރެއްވީ ފަސް މިލިއަން ގަސް އިންދުމުގެ ޕްރޮގްރާމާ ހަވާލުވެ ހުންނެވި ޑެޕިއުޓީ މިނިސްޓަރު އަހްމަދު އަތީފެވެ. ސްކައުޓް އެސޯސިއޭޝަންގެ ފަރާތުން ސޮއިކުރެއްވީ އެ އެސޯސިއޭޝަންގެ ނައިބު ރައީސް އަހުމަދު ހަނީފެވެ.
މި ބެޖު ހާސިލުކުރުމަށްޓަކައި އަމަލުކުރަންޖެހޭ ހާއްސަ ގައިޑްލައިނެއް މިހާރު ވަނީ އެކުލަވާލާފައެވެ. މި އެއްބަސްވުމުގެ ދަށުން ސްކައުޓުން އިންދަން ބޭނުންވާ ގަސްތައް ފޯރުކޮށްދޭނީ އެންވަޔަރަމެންޓް މިނިސްޓްރީންނެވެ. އަދި އިންދާ ގަސްތައް ރަނގަޅަށް ހެދި ބޮޑުވަންދެން، އެ ތަކެތި ބަލަހައްޓައި މޮނިޓާ ކުރުމުގެ ޒިންމާ ސްކައުޓުން އުފުލަންޖެހެއެވެ.
އެންވަޔަރަމެންޓް މިނިސްޓަރު އަލީ ޝަރީފު ވިދާޅުވީ، ފަސް މިލިއަން ގަސް އިންދުމުގެ ޕްރޮގްރާމަކީ ބިން ހިއްކުމާއި ތަންތަން ޒީނަތްތެރިކުރުމުގެ މަސައްކަތްތަކާ އެކުއެކީގައި އެ ތަންތަން ފެހިކުރުމަށް އިސްކަންދީގެން ހިންގާ ހަރަކާތެއް ކަމަށެވެ. މީގެއިތުރުން، މި ޕްރޮގްރާމާ ސްކައުޓުން ގުޅުމަކީ ލިބުނު ބޮޑު ކުރިއެރުމެއް ކަމަށާއި، މި ބެޖަކީ ސްކައުޓުންނަށް ވަރަށް މުހިންމު ބެޖަކަށް ވެގެންދާނެ ކަމަށް މިނިސްޓަރު ވިދާޅުވިއެވެ.
ރާއްޖެ ފެހިކުރުމުގެ މި ބޮޑު މަޝްރޫއުގެ ދަށުން މި އަހަރުގެ މިހާތަނަށް 2.3 މިލިއަން ގަސް އިންދާފައިވާއިރު، މި މަސައްކަތް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި ރާއްޖޭގެ 20 ރަށެއްގައި ގަސް ހައްދާ ނާސަރީތައް ގާއިމުކުރުމުގެ މަސައްކަތް ވެސް މިހާރު ދަނީ ބާރަށް ކުރިއަށެވެ.
