ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ދަރިކަލުން ކަމަށްވާ، އިބްރާހިމް ސިޔާދް ގާސިމް ހައްޔަރުކޮށްފިއެވެ.
ސިޔާދު ހައްޔަރުކުރީ ވިލާ ބިލްޑިންގް ބަލާ ފާސްކުރުމަށްފަހުއެވެ. ސިޔާދު އަކީ ވިލާ ގްރޫޕްގެ މެނޭޖިން ޑިރެކްޓަރުގެ މަޤާމު ފުރުއްވަމުން ގެންދަވާ ބޭފުޅާއެވެ.
ސިޔާދު ހައްޔަރުކުރުމުގެ އިތުރުން ވިލާ ބިލްޑިންގް އިން ބައެއް ތަކެތި ވެސް ފުލުހުން ގެންގޮސްފައިވާ ކަމަށް މައުލޫމާތު ލިބިފައިވެއެވެ.
ފުލުހުން ބުނީ ވިލާ ބިލްޑިންގް ބަލާ ފާސްކޮށްފައިވަނީ އަދި ސިޔާދު ހައްޔަރުކުރީ ފުލުހުން މިވަގުތު ތަޙުޤީޤުކުރަމުންދާ މައްސަލައަކާއި ގުޅިގެން ކަމަށެވެ.
ނަމަވެސް އެއީ ކޮން މައްސަލައެއްކަން ފުލުހުން ހާމައެއް ނުކުރެއެވެ
ވިލާ ބިލްޑިންގްގެ އިތުރުން ފުލުހުން ވަނީ ވިލާ ކުންފުނީގެ ޕެރެޑައިސް އައިލޭންޑް ރިސޯޓު ވެސް ބަލާ ފާސްކޮށްފައެވެ.
ސިޔާދު ހައްޔަރުކުރިއިރު ސަރުކާރުން އިއްޔެ ވަނީ 15 ދުވަހުގެ މުއްދަތަށް ރާއްޖޭގައި ކުއްލި ހާލަތު އިއުލާން ކުރައްވާފައެވެ. އެ މުއްދަތުގެ ތެރޭގައި ކޯޓު އަމުރަކާ ނުލާ މީހުން ހައްޔަރު ކުރުމާއި ބަލާ ފާސް ކުރުމުގެ ބާރު ސަލާމަތީ ބާރުތަކަށް ލިބޭނެއެވެ.
