ދައުލަތުގެ ދަރަނި އަދާކުރަން ދުރާލައި ތައްޔާރުވުމުގެ ގޮތުން ރާއްޖޭގައި އުފައްދާފައިވާ ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ޖަމާކުރި ފައިސާގެ ޖުމްލަ އަދަދު މިދިޔަ ޖޫން މަހުގެ ހަތަރުވަނަ ދުވަހާ ހަމައަށް އެއް ބިލިއަން ރުފިޔާއަށް އަރާފައިވާ ކަމަށް ފިނޭންސް މިނިސްޓްރީން ބުނެފިއެވެ. މިއީ މި ފަންޑަށް ފައިސާ ޖަމާކުރާ މިންވަރު އިތުރުވެ، ލިބުނު ބޮޑު ކުރިއެރުމެކެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، އެސްޑީއެފަށް ފައިސާ ޖަމާކުރި މިންވަރު މިހާރު ވަނީ ވަރަށް ބޮޑަށް އިތުރުވެފައެވެ. އެގޮތުން މިދިޔަ އަހަރުގެ އެ މުއްދަތުގައި ޖަމާކުރެވުނު 934 މިލިއަން ރުފިޔާއާ އަޅާބަލާއިރު، މިއީ ފާހަގަކޮށްލެވޭ ފަދަ ކުރިއެރުމެއް ކަމަށް އެ މިނިސްޓްރީން ބުންޏެވެ.
މި ފަންޑަކީ ދައުލަތުގެ ދަރަނިތައް ބަރާބަރަށް އަދާކުރުމަށް މަގުފަހިކުރުމުގެ ގޮތުން ހާއްސަކޮށްފައިވާ ފަންޑެކެވެ. ސަރުކާރުން ވަނީ މި ފަންޑު ބޭނުންކޮށްގެން ދައުލަތުގެ ދަރަނީގެ ބޮޑު ބައެއް މި އަހަރުގެ ތެރޭގައި ދައްކާފައެވެ. މީގެ އިތުރުން، ދައުލަތުން ދައްކަންޖެހޭ ސުކޫކު ދެއްކުމަށް ވެސް މި ފަންޑުގެ ފައިސާ ބޭނުންކޮށްފައިވެއެވެ.
މި އަހަރުގެ ބަޖެޓުގައި އެސްޑީއެފަށް ޖަމާކުރުމަށް ކަނޑައަޅާފައިވަނީ 2.4 ބިލިއަން ރުފިޔާއެވެ. މި ފަންޑަށް ފައިސާ ޖަމާކުރަނީ 2017 ވަނަ އަހަރުން ފެށިގެން ނަގަމުން އަންނަ އެއާޕޯޓް ޑިވެލޮޕްމެންޓް ފީގެ އިތުރުން، ވެލާނާ އިންޓަނޭޝަނަލް އެއާޕޯޓުން ދޭ ހިދުމަތްތަކުގެ އަގަށް ބަދަލު ގެނެސްގެން އިތުރުވާ ފައިސާއިންނެވެ.
