ސަރުކާރުން ކޮންޓްރެކްޓަރ ފައިނޭންސް އުސޫލުން ކުރިއަށްގެންދާ 55 ކައުންސިލް އިދާރާގެ މަސައްކަތް އަންނަ ޖުލައި މަހުގެ ނިޔަލަށް ނިންމާލެވޭނެ ކަމުގެ ޔަގީންކަން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ދެއްވައިފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވަޒީރު ވިދާޅުވީ، ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ ހަވާލުކޮށްގެން ކުރިއަށްގެންދާ މި މަޝްރޫއުގެ މަސައްކަތްތައް ދަނީ ވަރަށް ހިތްހަމަޖެހޭ ބާރުމިނެއްގައި ކަމަށެވެ. އަދި މި މަޝްރޫއު ނިމުމުން، މިއަހަރު އަލަށް އިންތިޚާބުވާ ކައުންސިލަރުން އެބޭފުޅުންގެ ތަމްރީނުތައް ނިންމަވާލެއްވުމަށްފަހު މަސައްކަތަށް ނުކުންނަވާއިރު، ޖާގަ ތަނަވަސް އަދި ޒަމާނީ މަސައްކަތުގެ މާހައުލެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.
ސަރުކާރުން ޖުމްލަ 105 ކައުންސިލް އިދާރާ ބިނާކުރުމަށް ނިންމާފައިވާއިރު، މީގެ ތެރެއިން 50 އިމާރާތެއް ބިނާކުރުމަށް ހަމަޖެހިފައިވަނީ ޗައިނާ ސަރުކާރުގެ އެހީގައެވެ. ވަޒީރު ވިދާޅުވީ އާރުސީސީން ކުރިއަށްގެންދާ 55 އިމާރާތަށް ބޭނުންވާ ފަރުނީޗަރު ގެނައުމުގެ މަސައްކަތް ވެސް މިހާރު ފަށާފައިވާ ކަމަށެވެ. މި އައު އިމާރާތްތަކަކީ ކައުންސިލަރުންގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެސް ފަސޭހަކަމާއެކު މަސައްކަތް ކުރެވޭނެ ގޮތަށް ފަރުމާކުރެވިފައިވާ ތަންތަނެވެ.
މީގެ އިތުރުން، ޕީއެސްއައިޕީގެ ދަށުން ކުރިއަށްދާ މަޝްރޫއުތަކުގެ ތެރެއިން މިހާތަނަށް 6 ކައުންސިލް އިދާރާއެއްގެ މަސައްކަތް މުޅިން ނިމިފައިވާކަން ވަޒީރު ހާމަކުރެއްވިއެވެ. އަދި ނުނިމި ހުރި ކ. ދިއްފުއްޓާއި ނ. މިލަދޫ ކައުންސިލް އިދާރާގެ މަސައްކަތްތައް މި މަހުގެ ތެރޭގައި އެމްޓީސީސީއާ ހަވާލުކޮށްގެން ކުރިއަށްގެންދިއުމަށް ވަނީ ނިންމާފައެވެ.
