ރާއްޖެއަށް މަސްތުވާތަކެތި (ޑްރަގް) އެތެރެކުރާ މީހުންނަށް މަރުގެ އަދަބު ދެވޭގޮތަށް، މަސްތުވާތަކެއްޗާ ބެހޭ ގާނޫނަށް ގެނައި އިސްލާހަށް މިއަދުން ފެށިގެން އަމަލުކުރަން ފަށައިފިއެވެ. ރައްޔިތުންގެ މަޖިލީހުން ފާސްކުރި މި ބިލު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީގުކުރައްވާފައިވަނީ މިދިޔަ ޑިސެމްބަރު މަހުގެ 6 ވަނަ ދުވަހުއެވެ.
މި އާ ގާނޫނުގެ ދަށުން މަރުގެ އަދަބު ދެވޭނީ ވަކި މިންގަނޑުތަކަކަށް ފެތޭ ހާލަތްތަކުގައެވެ. އެގޮތުން 350 ގްރާމަށް ވުރެ ގިނަ ކެނަބިސް، ނުވަތަ 250 ގްރާމަށް ވުރެ ގިނަ ޑައިމޯފިން ރާއްޖެއަށް އެތެރެކުރުމަކީ މަރުގެ އަދަބު ލިބޭނެ ކަމެކެވެ. މީގެ އިތުރުން ކެނަބިސް އަދި ޑައިމޯފިން ފިޔަވައި ޖަދުވަލު 1 ގައި ހިމެނޭ އެހެން ބާވަތެއްގެ މަސްތުވާތަކެތީގެ 100 ގްރާމަށް ވުރެ ގިނައިން އެތެރެކޮށްފިނަމަ ވެސް މަރުގެ އަދަބު އަންނާނެއެވެ.
ގާނޫނުގައި ބަޔާންކޮށްފައިވާ ގޮތުން ޑްރަގް އެތެރެކުރާ މީހުންނަށް މަރުގެ އަދަބު ދެވޭނީ ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާގުން އެގޮތަށް ނިންމުމުންނެވެ. ބެންޗުން އިއްތިފާގު ނުވާ ހާލަތްތަކުގައި، އެ މީހަކަށް ކަނޑައެޅޭނީ އުމުރު ދުވަހުގެ ޖަލު ހުކުމެކެވެ. އަދި އޭގެ އިތުރުން 100،000 ރުފިޔާ އާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
މި އިސްލާހަށް އަމަލުކުރަން ފެށުމުގެ ކުރިން ރާއްޖޭގައި މަރުގެ އަދަބު ކަނޑައެޅިފައި އޮންނަނީ ހަމައެކަނި މީހަކު މެރުމުގެ ކުށުގައެވެ. އެހެންކަމުން މިއީ މަސްތުވާތަކެތީގެ މައްސަލައެއްގައި މިފަދަ ހަރުކަށި އަދަބެއް ދިނުމަށް އަމަލުކުރަން ފެށި ފުރަތަމަ ފަހަރެވެ.
މަސްތުވާތަކެތި އެތެރެކުރާ މީހުންނާއި އޭގެ ވިޔަފާރިކުރާ މީހުންގެ އިތުރުން، އެ ނުބައި އަމަލުގެ ތެރެއިން ނުހައްގުން މުއްސަނދިކަން ހޯދާފައިވާ މީހުންނަށް ވެސް ހަރުކަށި އަދަބުތަކެއް މި ބިލުގައި ވަނީ ކަނޑައަޅާފައެވެ. މި ބަދަލާއެކު ރާއްޖެއަށް ޑްރަގް އެތެރެކުރުން ހުއްޓުވުމަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.
