ހުސްވެފައިވާ ކޮމިޝަނާ އޮފް ޕޮލިސްގެ މަގާމަށް އާ ބޭފުޅަކު އައްޔަނުކުރުމަށްޓަކައި، އެ މަގާމަށް ކުރިމަތިލުމުގެ ފުރުސަތު ހޯމް މިނިސްޓްރީން މިއަދު ހުޅުވާލައިފި އެވެ. މި މަގާމަށް ޝައުގުވެރިވާ ފަރާތްތަކުން ކުރިމަތިލުމުގެ އެންމެ ފަހު ސުންގަޑިއަކީ މި މަހުގެ 23 ވާ ހޯމަ ދުވަހުގެ މެންދުރުފަހު 14:00 އެވެ.
ހޯމް މިނިސްޓްރީން ހާމަކޮށްފައިވާ ގޮތުގައި، މި މަގާމަށް ކުރިމަތިލެވޭނީ ފުލުހުންގެ ހިދުމަތުގެ އެސިސްޓަންޓް ކޮމިޝަނާ އޮފް ޕޮލިސްގެ ރޭންކުން ފެށިގެން މަތީގެ ރޭންކުތަކުގައި ތިއްބެވި އޮފިސަރުންނަށެވެ. ޕޮލިސް ކޮމިޝަނަރުގެ މަގާމު ހުސްވީ، އެ މަގާމުގައި ހުންނެވި އިސްމާއިލް ނަވީން މިދިޔަ މަހުގެ ތެރޭގައި ރިޓަޔާ ކުރެއްވުމާ ގުޅިގެންނެވެ. ނަވީން ރިޓަޔާ ކުރެއްވި ވަކި ހާއްސަ ސަބަބެއް ސަރުކާރުން ހާމަކޮށްފައެއް ނުވެ އެވެ.
ފުލުހުންގެ ގާނޫނުގައިވާ ގޮތުން ކޮމިޝަނަރަކު މަގާމުން ވަކިވެއްޖެ ހާލަތެއްގައި، އެ އިދާރާ ވަގުތީ ގޮތުން ހިންގަވާނީ ޑެޕިއުޓީ ކޮމިޝަނަރެކެވެ. އެގޮތުގެ މަތިން މިވަގުތު ފުލުހުންގެ އިދާރާ ހިންގަވަމުން ގެންދަވަނީ ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީ އެވެ. އަލަށް އައްޔަނުކުރެވޭ ކޮމިޝަނަރަކީ މި ސަރުކާރުން މި މަގާމަށް އައްޔަނުކުރާ ތިންވަނަ ބޭފުޅާ އެވެ.
މި ސަރުކާރުގައި މީގެ ކުރިން މި މަގާމު ފުރުއްވީ އަލީ ޝުޖާއު އެވެ. އޭނާ މަގާމުން އިސްތިއުފާ ދެއްވީ 2025 އޭޕްރީލް 26 ގަ އެވެ. ޝުޖާއު އިސްތިއުފާ ދެއްވީ އާއިލީ ޒިންމާތަކުގެ އިތުރުން، ހެންވޭރު އިމާރާތަކުން ވެއްޓި ހައްވާ ޔުމްނަށް ބޮޑެތި އަނިޔާތަކެއް ލިބުނު ހާދިސާގެ ތަހުގީގާ ގުޅިގެން އާންމުންގެ ފާޑުކިޔުންތައް އަމާޒުވެފައި ވަނިކޮށެވެ. އާ ކޮމިޝަނަރަކު އައްޔަނު ކުރުމުގެ މަސައްކަތް ހޯމް މިނިސްޓްރީން މިހާރު އަންނަނީ ކުރަމުންނެވެ.
