ސްޓެލްކޯގެ ކަރަންޓުގެ ހިދުމަތްތައް ޒަމާނީ ފަސޭހަތަކާއެކު އޮންލައިންކޮށް ހޯދޭނެ ގޮތަށް ފަރުމާކޮށްފައިވާ “ވަށަނި” ޕޯޓަލް ރަސްމީކޮށް އިފްތިތާހުކޮށްފި އެވެ. މި ޕޯޓަލް އިފްތިތާހުކޮށްދެއްވީ ސްޓެލްކޯ ހިންގެވުމާ ހަވާލުވެވަޑައިގެން ހުންނެވި، ޑެޕިއުޓީ މެނޭޖިންގ ޑިރެކްޓަރު ޑރ. އަލީ އަޒުވަރު އެވެ.
މި ޕޯޓަލަކީ ރާއްޖޭގެ ޑިޖިޓަލައިޒޭޝަން ޕްރޮގްރާމާއި، ރައީސް ޑރ. މުހައްމަދު މުއިއްޒު ގެންގުޅުއްވާ “މޯލްޑިވްސް 2.0” ގެ ތަސައްވުރާ އެއްގޮތަށް ގެނެވުނު މުހިންމު ބަދަލެކެވެ. އީފާސް މެދުވެރިކޮށް ފަސޭހަކަމާއެކު ރަޖިސްޓްރީ ކޮށްލެވޭ މި ޕޯޓަލް މެދުވެރިކޮށް، ކަރަންޓުގެ ހިދުމަތްތަކަށް އެދުމާއި ފައިސާ ދެއްކުމުގެ ކަންކަން ރާއްޖެއާއި ރާއްޖެއިން ބޭރުގައި ހުރެގެންވެސް ކުރެވޭނެ އެވެ.
މި ޕޯޓަލް އިފްތިތާހު ކުރުމުގެ ރަސްމިއްޔާތުގައި ވާހަކަ ދައްކަވަމުން ޑރ. އަލީ އަޒުވަރު ވިދާޅުވީ، މިއީ ސްޓެލްކޯގެ ހިދުމަތްތައް ވަށާޖެހޭ، ޕޭޕަރލެސް ނިޒާމަކަށް ބަދަލުވެގެންދިޔަ އުފާވެރި ދުވަހެއް ކަމަށެވެ. “ވަށާ ޖެހޭ ހިދުމަތެއް. އަޅުގަނޑުމެންގެ ހިދުމަތް އޮންލައިން ކުރެވި ޕޭޕަރލެސް ސިސްޓަމަކަށް މިވެގެން މިދިޔައީ. މިއީ އަޅުގަނޑުމެން ދުވަސްތަކެއް ވަންދެން ކުރަމުން އައި އުއްމީދެއްގެ ނިމުން،” އަޒުވަރު ވިދާޅުވި އެވެ.
މީގެ އިތުރުން، ޔޫ.އާރް.އޭ ގެ އިލެކްޓްރިކަލް އިންޖިނިއަރިންގ ލައިސަންސް އޮންނަ ފަރާތްތަކަށް، އެ ފަރާތެއްގެ ނަމުގައި ހުށަހެޅޭ ހިދުމަތްތަކުގެ ފޯމުތައް ބަލައިގަނެ، އެޕްރޫވް ކުރުމުގެ ފުރުސަތުވެސް މި ޕޯޓަލްގައި ވަނީ ހަމަޖައްސާފަ އެވެ. ހުށަހަޅާފައިވާ އެޕްލިކޭޝަންތަކުގެ މަރުހަލާތައް ކުރިއަށްދާ ގޮތުގެ މައުލޫމާތު އެސްއެމްއެސް މެދުވެރިކޮށް ކަސްޓަމަރުންނަށް ލިބޭނެ ކަމަށްވެސް ސްޓެލްކޯ އިން ބުންޏެވެ.
