ދެހާސް ސައްބީސް ވަނަ އަހަރުގެ އޭޕްރީލް މަހު ހަމަވާ 500 މިލިއަން ޑޮލަރުގެ ސުކޫކު ދައްކައި ހަލާސްކުރުމަށްޓަކައި 650 މިލިއަނަށްވުރެ ގިނަ ޑޮލަރު މިހާރު ރައްކާކުރެވިފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނަސް އެކަން ކުރެވޭނެ ވަރަށް ސަރުކާރުގައި ފައިސާ އެބަހުރި ކަމަށެވެ.
ރައީސް ވިދާޅުވި ގޮތުގައި ރާއްޖޭގެ ގްރޮސް ރިޒާވް މިހާރު ވަނީ 1.27 ބިލިއަން ޑޮލަރަށް އަރާފައެވެ. މިއީ ރާއްޖޭގެ ތާރީހުގައި ވެސް ގްރޮސް ރިޒާވް މައްޗަށް ނުދާހާ މިންވަރެއް ކަމަށް އެމަނިކުފާނު ފާހަގަކުރެއްވިއެވެ. މިއާއެކު ދައުލަތުގެ މާލީ ހާލަތު ވަރަށް ބޮޑަށް ރަނގަޅުވަމުން އަންނަކަން ރައީސް ވަނީ ޔަގީންކޮށްދެއްވާފައެވެ.
ސަރުކާރުން ފައިސާ ރައްކާކޮށްފައިވާ ގޮތުގެ ތަފްސީލު ދެއްވަމުން ރައީސް ވިދާޅުވީ، ރޭގެ ނިޔަލަށް ސޮވެރިން ޑިވެލޮޕްމަންޓް ފަންޑު (އެސްޑީއެފް) ގައި 320 މިލިއަން ޑޮލަރަށްވުރެ ގިނައިން ހުރިއިރު، ޔޫސަބަލް ރިޒާވްގައި 330 މިލިއަން ޑޮލަރަށްވުރެ ގިނަ ފައިސާ އެބަހުރި ކަމަށެވެ. އެހެންކަމުން އެ ދެ އަދަދު އެއްކޮށްލުމުން ޖުމްލަ 650 މިލިއަން ޑޮލަރަށްވުރެ ގިނަ ފައިސާ ސުކޫކު ދެއްކުމަށް އެބަހުރި ކަމަށް ވިދާޅުވިއެވެ.
މިއަހަރަށް ބޭނުންވާ އިތުރު ފައިސާ ހޯދުމަށް ކުރެވެމުންދާ މަސައްކަތްތައް ވެސް ވަރަށް ކާމިޔާބު ކަމަށާއި، ފައިސާ ހޯދުމުގެ މުއާމަލާތްތައް ނިމުމަކާ ގާތްވެފައިވާ ކަމަށް ރައީސް ވިދާޅުވިއެވެ. އިގުތިސާދު މެނޭޖުކުރަމުން ދަނީ އެތެރެއާއި ބޭރުގެ ދަރަނިތައް ވެސް ދެއްކޭނެ ގޮތަށް ކަމަށް ވުމާއެކު، ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމުގެ ޔަގީންކަން އެމަނިކުފާނު ވަނީ ދެއްވާފައެވެ. ސަރުކާރުން އަންނަނީ ސުކޫކަށް ފައިސާ ދެއްކުމުގެ ތާވަލާ އެއްގޮތަށް މިހާތަނަށް ވެސް ބަރާބަރަށް ފައިސާ ދައްކަމުންކަން ރައީސް ވަނީ ފާހަގަކުރައްވާފައެވެ.
