ރާއްޖޭގައި އެއްފަހަރާ އެންމެ ގިނަ ހާފިޒުން ދަސްވެނިވި ރަސްމިއްޔާތުގެ ރަސްމިއްޔާތު ރޭ ބާއްވައިފިއެވެ.
އިސްލާމީ މަރުކަޒުގައި ބޭއްވި މި ރަސްމިއްޔާތުގައި 19 ފިރިހެން ހާފިޒުންނާއި 12 އަންހެން ހާފިޒުން ދަސްވެނިވިއެވެ. ދަސްވެނިވި ދަރިވަރުންނަށް މެޑައްޔާއި އިނާމް ދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި ރަސްމިއްޔާތުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދުވެސް ބައިވެރިވެވަޑައިގެންނެވިއެވެ.
މިއަހަރުގެ ޙާފިޡުންގެ ދަސްވެނިވުމުގެ ރަސްމިއްޔާތަކީ މިހާތަނަށް އެންމެ ގިނަ އަދަދަކަށް ޙާފިޡުން ދަސްވެނިވި ރަސްމިއްޔާތެވެ. އެގޮތުން ރޭގެ ރަސްމިއްޔާތުގައި 31 ޙާފިޡުން ދަސްވެނިވެފައިވާއިރު މި ރަސްމިއްޔާތުގައި ޙާފިޡުންނަށް ރައީސުލްޖުމުހޫރިއްޔާ ދެއްވާ މެޑައްޔާއި އިނާމު 50 ޙާފިޡުންނަށް ވަނީ ދެއްވާފައެވެ.
މެޑަލް އެރުވި ހާފިޒުންގެ ތެރޭގައި ހިމެނެނީ މިދިޔަ ރޯދަ މަހުން ފެށިގެން މިރޯދަ މަހުގެ ނިޔަލަށް ގުރުއާން ހިތުދަސްކޮށް، ގުރުއާނާ ބެހޭ ގައުމީ މަރުކަޒުން ކަނޑައަޅާފައިވާ ޝަރުތުތަކާ އެއްގޮތަށް ހިފްޒު އިމްތިހާނު ކޮމެޓީއަށް ކިޔައިދީފައިވާ ހާފިޒުންނަށެވެ. ހާފިޒުންގެ ތެރެއިން ރައީސްގެ މެޑަލް ހާސިލްކުރި ހާފިޒުންނަށް ވެސް މިރޭ ވަނީ މެޑަލް ހަވާލުކޮށްފަ އެވެ.
މި ރަސްމިއްޔާތުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ވިދާޅުވީ މިއީ ރާއްޖޭގައި އެންމެ ގިނަ ހާފިޒުން އެއްފަހަރާ ދަސްވެނިވާ އަހަރު ކަމަށެވެ. އަދި ރާއްޖޭގެ ހާފިޒުންގެ އަދަދު 301 އަށް އަރާފައިވާ ކަމަށް ވެސް އޭނާ ވިދާޅުވި އެވެ. އެއީ 139 އަންހެން ހާފިޒުންނާއި 162 ފިރިހެން ހާފިޒުންނެވެ.
ކީރިތި ޤުރްއާނަށް ލޯބިކުރާ މުޖުތަމަޢެއް ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ އިރުޝާދުގެ ދަށުން ސަރުކާރުން ދަނީ މަސައްކަތްކުރަމުންނެވެ. ކީރިތި ޤުރްއާން ހިތުދަސްކުރާ ފަރާތްތަކަށް ހިތްވަރުދީ އެކަމުގައި ކުރިއަށްދިޔުމަށް ބާރުއެޅުމަށްވެސް އެކި ކަންކަން ސަރުކާރުންވަނީ ކުރައްވާފައެވެ. އެގޮތުން ރައީސުލްޖުމްހޫރިއްޔާ ވަނީ ޙާފިޒުންނަށް ދައުލަތުންދޭ އެލަވަންސް ދެގުނަ ބޮޑުކުރައްވާފައެވެ.
އެގޮތުން ކުރިން 2000 ރުފިޔާގެ އެލަވަންސްއެއް ދެމުން އައިނަމަވެސް މިހާރު 4000 ރުފިޔާގެ އެލަވަންސްއެއް އަންނަނީ ދެމުންނެވެ. މީގެ އިތުރުން ކީރިތި ޤުރުއާނުގެ ޢިލްމު ފުޅާކުރުމަށް ކުރައްވާ މަސައްކަތްތަކުގެ ދަށުން ޤައުމީ ޤުރުއާން މުބާރާތުގެ ވަނަތަކަށް އަންނަ ފަރާތްތަކަށް ދޭ އިނާމްވެސް ބޮޑު ކުރައްވާފައެވެ.
ސަރުކާރުގެ އަމާޒަކީ، މި 5 އަހަރުގެ ތެރޭގައި ކީރިތި ޤުރުއާން ހިތުދަސް ކޮށްފައިވާ ޙާފިޒުންގެ ޢަދަދު 500 އަށް އެރުވުމެވެ. މިވަގުތު މާލެއާއި އަތޮޅުތަކުގައި 1800 އަށްވުރެ ގިނަ ފަރާތުން ޤުރުއާން ހިތުދަސް ކުރުމުގެ މަސައްކަތް ކުރަމުންދާ ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ. އަދި މިއީ ރާއްޖޭގެ އިސްލާމީ ތާރީޚުގައިވެސް ފާހަގަކުރެވޭ ކަމެއް ކަމަށް އެވުޒާރާއިން ވިދާޅުވެއެވެ.
