މިއަހަރު އުތުރު އެމެރިކާގެ ތިން ގައުމު ކަމަށްވާ އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ވޯލްޑް ކަޕް ފުޓްބޯޅަ މުބާރާތާ ދިމާކޮށް، އެމެރިކާގެ ފްލޮރިޑާ ސްޓޭޓަށް ޒިޔާރަތްކުރާ ބޭރުގެ ފަތުރުވެރިންނަށް އަމާޒުކޮށް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ޓްރެވަލް އެލާޓެއް ނެރެފިއެވެ.
މި އެލާޓް ނެރެފައިވަނީ އެ ސްޓޭޓްގައި އިމިގްރޭޝަން ގާނޫނުތައް ތަންފީޒުކުރުން ވަރުގަދަކުރުމާ ގުޅިގެން، ނުހައްގުން މީހުން ހިފަހައްޓާ ޑީޕޯޓްކޮށްލުމުގެ ބިރު އޮތް ކަމަށް ބުނެއެވެ.
ސިވިލް އަދި ހިއުމަން ރައިޓްސް ޖަމާއަތްތަކުން އެކުލެވޭ ކޯލިޝަނަކުން ނެރުނު މި އިންޒާރުގައި ބުނެފައިވަނީ، ފްލޮރިޑާއަށް ޒިޔާރަތްކުރާ ފަރާތްތަކުން “އިންތިހާއަށް ސަމާލުވުމަށާއި”، އަބަދުވެސް އައިޑެންޓިފިކޭޝަން ލިޔެކިޔުންތައް ހިފައިގެން އުޅުމަށެވެ. އަދި ދަތުރުގެ ކުރިން އެމީހެއްގެ ގައުމުގެ ކޮންސިއުލޭޓްގައި ރަޖިސްޓްރީވުމަށް ވެސް ވަނީ އިރުޝާދު ދީފައެވެ.
މީގެ އިތުރުން، އެންފޯސްމަންޓް އިދާރާތަކުން ޖަވާބުދާރީވުމާއި ދެފުށް ފެންނަ އުސޫލެއް ގާއިމްކުރަންދެން ފްލޮރިޑާއަށް ދަތުރުކުރުމާ މެދު އަލުން ވިސްނުމަށް ވެސް ވަނީ އެދިފައެވެ.
ފްލޮރިޑާ އިމިގްރަންޓް ކޯލިޝަންގެ އެގްޒެކެޓިވް ޑައިރެކްޓަރު ޓެސާ ޕެޓިޓް ވިދާޅުވީ، “ފްލޮރިޑާއަކީ މިހާރު ބައިނަލްއަގުވާމީ ފަތުރުވެރިންނަށް ރައްކާތެރި މަންޒިލެއް ނޫން” ކަމަށެވެ. އޭނާ ތުހުމަތު ކުރެއްވި ގޮތުގައި، މީހާގެ ސިފައަށް ނުވަތަ ވާހަކަދައްކާ ބަހުރުވައަށް ބަލައި، އެއްވެސް ސަބަބަކާ ނުލައި މީހުން ހިފަހައްޓައި ފާސްކުރުމުގެ ފުރުސަތު އެބައޮތެވެ.
މި ކޯލިޝަނުން ފާހަގަކޮށްފައިވާ ގޮތުގައި، އެމެރިކާގެ ރައްޔިތުންނާއި ގާނޫނީ ގޮތުން އެގައުމުގައި ދިރިއުޅޭ މީހުން ވެސް އާދައިގެ ޓްރެފިކް ޗެކްޕޮއިންޓްތަކުން ހިފަހައްޓައި، ވަކީލެއްގެ އެހީތެރިކަމާ ނުލައި ގިނަ ދުވަސްތަކެއް ވަންދެން ބަންދުގައި ބައިތިއްބާފައިވާ ކަމުގެ ރިޕޯޓްތައް ލިބިފައިވެއެވެ.
މި ޓްރެވަލް އެލާޓާ ގުޅިގެން ފްލޮރިޑާގެ ފަތުރުވެރިކަމާ ބެހޭ އިދާރާތަކުން ވަނީ ވަރަށް ބޮޑަށް ފާޑުކިޔާފައެވެ. ވިޒިޓް ފްލޮރިޑާގެ ސީއީއޯ ބްރަޔަން ގްރިފިން ވިދާޅުވީ، މިއީ ސިޔާސީ މަގްސަދެއްގައި ނެރެފައިވާ ހަގީގަތެއް ނެތް އިންޒާރެއް ކަމަށާއި، މީގެ ސަބަބުން ސްޓޭޓްގެ އިގްތިސާދަށް ބޮޑެތި ގެއްލުންތަކެއް ލިބޭނެ ކަމަށެވެ. ގާނޫނީ ގޮތުން ޒިޔާރަތްކުރާ ފަރާތްތަކަށް އެއްވެސް ބިރެއް ނެތް ކަމަށާއި، ފްލޮރިޑާއިން ފަތުރުވެރިންނަށް މަރުހަބާ ކިޔާނެ ކަމަށް އޭނާ ވިދާޅުވިއެވެ.
2026 ވަނަ އަހަރުގެ ވޯލްޑް ކަޕް އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާއިރު، ފްލޮރިޑާގެ މިއާމީގައި މުބާރާތުގެ ހަތް މެޗު ކުޅުމަށް ވަނީ ތާވަލުކުރެވިފައެވެ. މި މުބާރާތަށް އެތައް ލައްކަ ބަޔަކު ޒިޔާރަތްކުރާނެ ކަމަށް ބެލެވޭއިރު، ފްލޮރިޑާގައި ލޯކަލް ފުލުހުންނަށް އިމިގްރޭޝަން ގާނޫނުތައް ތަންފީޒުކުރުމުގެ ބާރު ދީފައި އޮތުމަކީ އިންސާނީ ހައްގުތަކަށް މަސައްކަތްކުރާ ފަރާތްތަކުގެ ބޮޑު ކަންބޮޑުވުމެކެވެ.
