ޑާލާ ޕޯޓަލްއަކީ މޯލްޑިވްސް 2.0ގެ ލަނޑުދަނޑިތައް ހާސިލްކުރުމަށް އެހީތެރިވެދޭ ޕޯޓަލެއް ކަމަށް ދާޚިލީ ސަލާމަތާއި ފަންނީއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެ އެވެ.
ވަޒީރު މިހެން ވިދާޅުވީ ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން، ‘ޑެމޭޖް އެސެސްމަންޓް އެންޑް ލޮސް އެނަލިސިސް’ (ޑާލާ) ޕްލެޓްފޯމް އިފްތިތާހްކުރުމަށްޓަކައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
” މި ޕްލެޓްފޯމް މެދުވެރިކޮށް ކާރިސާތަކުގެ ސަބަބުން ރަށްރަށާއި މުޖުތަމައުތަކާއި އެކި ދާއިރާތަކަށް ކާރިސާތަކުން ކުރާ އަސަރުތައް ވަރަށް ސާފުކޮށް ދެނެގަނެވޭނެ. ސަރުކާރުގެ އިދާރާތަކަށް ޓާގެޓެޑް ރެސްޕޮންސް ސްޓްރެޓެޖީތައް އެކުލަވާލުމާއި، އިންވެސްޓްމަންޓްތަކަށް އިސްކަން ދިނުމާއި، ރިކަވަރީ އެކްޝަންތައް ރޭވުމަށްވެސް މަގު ފަހިވެގެންދޭ” ވަޒީރު އިޙްސާން ވިދާޅުވި އެވެ.
މި ރަސްމިއްޔާތުގައި ވާހަކަ ދައްކަވަމުން ވަޒީރު ވަނީ ޑާލާ ޕޯޓަލްއަކީ ޓެކްނޮލޮޖީގެ ނަޒަރުން ބަލާއިރު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޑިޖިޓަލައިޒް ތަޞައްވުރު 2.0 ރަމްޒުކޮށްދޭ ޕޯޓަލްއެއްކަމަށް ވިދާޅުވެފަ އެވެ.
އަދި މި ތަޞައްވުރުގެ ދަށުން މުއައްސަސާތައް ޒަމާނީ ފެންވަރަށް ތަރައްޤީކޮށް، ޢާންމު ޚިދުމަތްތައް ފޯރުކޮށްދިނުމަށް ޑިޖިޓަލް ވަސީލަތްތަކުގެ މުހިއްމުކަންވެސް ވަޒީރު ފާހަގަކުރެއްވި އެވެ.
މި ޕްލެޓްފޯމްގެ ސަބަބުން، މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެއެވެ. އެގޮތުން ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެއެވެ. އަދި ލިބުނު ގެއްލުންތަކުގެ ހިސާބުތައް އޮޓޮމެޓިކުން ތައްޔާރުކުރުމާއި ގެއްލުން ވަޒަންކުރުމުގެ ސައްހަކަން އިތުރުވެ އަވަސްވެގެންދާނެ އެވެ.
