އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަށް ބީއެމްއެލް އެފޯޑަބަލް ހޯމް ލީސިން ކުންފުނިން ހިންގާ ފަސް މަޝްރޫއެއްގެ އަމަލީ މަސައްކަތް މިއަދު ފަށައިފިއެވެ. މިއީ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ އިންކްލޫސިވް ނެޝަނަލް އެފޯޑަބަލް ހައުސިން ސްކީމް (އައިއެންއޭއެޗް) އާއި ހައުސިން އެންޑް ކޮންސްޓްރަކްޝަން މިނިސްޓްރީ ގުޅިގެން ކުރިއަށް ގެންދާ މުހިންމު މަސައްކަތެކެވެ.
މި މަޝްރޫއުތައް ކުރިއަށް ގެންދިއުމަށް ހަވާލުކޮށްފައިވަނީ ރާއްޖޭގެ ކުންފުނިތަކާއި ބޭރުގެ ކުންފުނިތަކަކަށެވެ. އެގޮތުން ރާއްޖޭގެ ކުންފުނިތައް ކަމަށްވާ އަމީން ކޮންސްޓްރަކްޝަން އާއި އެފްޑަބްލިއު ކޮންސްޓްރަކްޝަން އަދި ރަޝީދު ކާޕެންޓްރީ ކޮންސްޓްރަކްޝަން (އާރުސީސީ) އަށް މަސައްކަތް ވަނީ ހަވާލުކޮށްފައެވެ. މީގެ އިތުރުން އިންޓަނޭޝަނަލް ކޮންޓްރެކްޓަރުންގެ ގޮތުގައި ހިމެނެނީ ބެއިޖިން އަރބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ) އެވެ.
މި މަޝްރޫއުތަކުގެ މަސައްކަތް ފެށުމަކީ އެމްއެމްއޭގެ ހައުސިން ސްކީމް ތަންފީޒުކުރުމުގައި އެޅުނު މުހިންމު ފިޔަވަޅެއް ކަމަށް އެ ފަރާތްތަކުން ބުންޏެވެ. މިއަދު ބޭއްވި ހާއްސަ ރަސްމިއްޔާތެއްގައި މި މަސައްކަތް ރަސްމީކޮށް ފައްޓަވައިދެއްވިއިރު، މިއީ ބޯހިޔާވަހިކަމުގެ ދާއިރާއަށް ލިބުނު ބޮޑު ކުރިއެރުމެއް ކަމަށް ފާހަގަކުރެއެވެ.
