ބޭންކް އޮފް މޯލްޑިވްސް (ބީއެމްއެލް) އިން ވިޔަފާރިތަކަށް ހާއްސަކޮށްގެން، މުސާރަ އާއި އެލަވަންސް ފަދަ ފައިސާ އެއްފަހަރާ ގިނަ ބަޔަކަށް ފޮނުވާލެވޭ “ބަލްކް ޕޭމަންޓް” ގެ ހިދުމަތް ތައާރަފްކޮށްފިއެވެ. މިއީ ވިޔަފާރިތަކުގެ މާލީ މުއާމަލާތްތައް ހިންގުމަށް ފަސޭހަކޮށްދިނުމުގެ ގޮތުން ބޭންކުން ފެށި އާ ހިދުމަތެކެވެ.
މި ހިދުމަތް ބޭނުންކޮށްގެން ކުންފުނިތަކަށް މުވައްޒަފުންގެ މުސާރަ، އެލަވަންސް އަދި ހިއްސާގެ ފައިސާ ނުވަތަ ޑިވިޑެންޑް، އެއްފަހަރާ ގިނަ އެކައުންޓްތަކަކަށް ޖަމާކޮށްދެވޭނެއެވެ. ބީއެމްއެލްއިން ބުނި ގޮތުގައި މިއީ ވިޔަފާރިތަކުގެ މަސައްކަތްތައް އިތުރަށް ހަލުވިކޮށް، އޮޓޮމޭޓެޑްކޮށް ކުރިއަށް ގެންދިއުމަށް ފަރުމާކޮށްފައިވާ ހިދުމަތެކެވެ.
ބީއެމްއެލްގެ މި ހިދުމަތް މެދުވެރިކޮށް ދިވެހި ރުފިޔާގެ އިތުރުން ޑޮލަރުން ވެސް މުއާމަލާތް ކުރެވޭނެއެވެ. ބޭންކުގެ އެކައުންޓްތަކަށް ފައިސާ ޖަމާކުރުމުގެ ކަންކަން އޮޓޮމޭޓެޑް ނިޒާމެއްގެ ތެރެއިން ރައްކާތެރިކަމާއެކު އަވަހަށް ކުރިއަށް ގެންދެވޭނެ އިންތިޒާމު މި ހިދުމަތުގެ ސަބަބުން ހަމަޖެހިގެންދާނެއެވެ.
މިކަމާ ގުޅޭގޮތުން ބީއެމްއެލްގެ ޗީފް ބިޒްނަސް އޮފިސަރު މޫސާ ނިމާލް ވިދާޅުވީ، ޑިޖިޓަލްކޮށް އެއްފަހަރާ ގިނަ މުއާމަލާތްތަކެއް ހިންގޭނެ ވަސީލަތެއް ލިބުމަކީ ވިޔަފާރިތަކަށް ލިބޭނެ ވަރަށް ބޮޑު އެހީތެރިކަމެއް ކަމަށެވެ. އަދި މީގެ ސަބަބުން ފައިސާ ފޮނުވުމުގެ ކަންކަން އަވަސްވެ، އެއްވެސް ތަކްލީފެއް ނެތި ރައްކާތެރިކަމާއެކު ކުރިއަށް ގެންދެވޭނެ ކަމަށް އޭނާ ފާހަގަކުރެއްވިއެވެ.
ބީއެމްއެލްއިން ބުނެފައިވަނީ އެ ބޭންކުން އަބަދުވެސް މަސައްކަތް ކުރަމުން ދަނީ ކަސްޓަމަރުންގެ ބަދަލުވަމުންދާ ބޭނުންތަކާ އެއްގޮތަށް، ފަސޭހަ އަދި ޒަމާނީ ހައްލުތައް ހޯދައިދިނުމަށް ކަމަށެވެ. އަދި ވިޔަފާރިތައް ކުރިއެރުވުމަށް ބޭނުންވާ އެހީތެރިކަން އަބަދުވެސް ފޯރުކޮށްދޭނެ ކަމަށް ބޭންކުން ބުނެއެވެ.
