އުރީދޫ މޯލްޑިވްސްއިން މިހާރު ކުރިއަށް ގެންދާ ގޯލްޑަން ފުޓްސަލް ޕްރޮމޯޝަންގެ ދެވަނަ ހަފްތާގެ ނަސީބުވެރިޔާ ހޮވައިފިއެވެ. ގިނަ އަދަދެއްގެ ބަޔަކު ބައިވެރިވި މި ލަކީޑްރޯއިން، ދެވަނަ ހަފްތާގެ ނަސީބުވެރިއަކަށް ހޮވިފައިވަނީ މާލެއަށް ނިސްބަތްވާ އަލީ ޝާހިދެވެ.
މިއީ ހުޅުމާލެ ރެހެންދި ޓާފް ދަނޑުގައި މި ދުވަސްވަރު ފޯރިއާއެކު ކުރިއަށްދާ ގޯލްޑަން ފުޓްސަލް މުބާރާތާ ގުޅުވައިގެން އުރީދޫއިން ކުރިއަށް ގެންދާ ހާއްސަ ހަރަކާތެކެވެ. މުބާރާތުގެ މެޗުތައް ކުޅޭ ދުވަސްތަކުގައި، ދަނޑު ސަރަހައްދުގައި ހުންނަ އުރީދޫ ޓެންޓުން ހިދުމަތް ހޯދާ ކަސްޓަމަރުންނަށް މި ޕްރޮމޯޝަންގައި ބައިވެރިވުމުގެ ފުރުސަތު އޮންނާނެއެވެ.
މި ޕްރޮމޯޝަންގައި ބައިވެރިވުމަށްޓަކައި އެ ކުންފުނީގެ ޓެންޓުން ވަކި ހިދުމަތްތަކެއް ހޯދަން ޖެހެއެވެ. އޭގެ ތެރޭގައި ޕްރީޕެއިޑް، ޕޯސްޓްޕެއިޑް، ސުޕަނެޓްގެ ހިދުމަތްތައް ނުވަތަ 5ޖީ ޑިވައިސްއެއް ގަތުން ހިމެނެއެވެ. މިއިން ކޮންމެ ހިދުމަތެއް ހޯދައިގެން ވެސް އަގުހުރި އިނާމުތައް ލިބޭ މި ލަކީޑްރޯގައި ބައިވެރިވެވޭނެއެވެ.
ނަސީބުވެރިންނަށް ދިނުމަށް ކަނޑައަޅާފައިވާ އިނާމުތަކުގެ ތެރޭގައި ގޭތެރޭގައި ބޭނުންކުރާ މުހިންމު ސާމާނު ހިމެނެއެވެ. އޭގެ ތެރޭގައި ޓީވީ، ފްރިޖް، ސޯފާ އަދި މައިކްރޯވޭވް އަވަން ފަދަ ތަކެތި ހިމެނެއެވެ. މީގެ އިތުރުން ކޮންސިއާޖް ގްރޫޕުން ހުށަހަޅާފައިވާ މެލޭޝިއާ ދެކޮޅު ޓިކެޓް ލިބުމުގެ ފުރުސަތު ވެސް މި ޕްރޮމޯޝަންގެ ތެރެއިން ލިބިގެންދާނެއެވެ.
ގޯލްޑަން ފުޓްސަލް މުބާރާތް އަންނަ މަހުގެ 14 ވަނަ ދުވަހުގެ ނިޔަލަށް ކުރިއަށްދާނެއެވެ. އެހެންކަމުން މުބާރާތް ނިމެންދެން، ކޮންމެ ހަފްތާއަކު ވެސް ނަސީބުވެރިއެއް ހޮވުމަށް ވަނީ ހަމަޖެހިފައެވެ. މެޗު ބަލަން ދަނޑަށް ޒިޔާރަތްކުރާ ފަރާތްތަކުން އުރީދޫ ޓެންޓަށް ޒިޔާރަތްކޮށްގެން މި ފުރުސަތުތައް ބޭނުންކުރުމަށް އެ ކުންފުނިން އެދެއެވެ.
