ދިވެހިރާއްޖޭގެ ތިމާވެށި ހިމާޔަތްކޮށް، ފެހިކަން އިތުރުކުރުމަށް ސަރުކާރުން ކުރިއަށްގެންދާ 5 މިލިއަން ގަސް އިންދުމުގެ މަޝްރޫޢު ވަރަށް ކާމިޔާބުކަމާއެކު ކުރިއަށްދާކަމަށް އެންވައިރަމަންޓް މިނިސްޓްރީން ހާމަކޮށްފިއެވެ.
އެ މިނިސްޓްރީން ބުނީ މި މަޝްރޫއުގެ ދަށުން މިހާތަނަށް އެތައް ހާސް ގަހެއް އިންދިފައިވާ ކަމަށާއި، ކޮންމެ ގަހެއް އިންދުމަކީ ދިވެހިރާއްޖެ އިތުރަށް ފެހިކޮށް، ސިއްހަތަށް ފައިދާ ހުރި މާހައުލަކަށް އެއް ފިޔަވަޅު ކުރިއަށް ދިއުން ކަމުގައެވެ. ކޮންމެ ގަހަކީ ތިމާވެށި ރައްކާތެރިކުރުމަށް އެޅޭ މުހިންމު ފިޔަވަޅެއްކަން ފާހަގަކޮށް މިނިސްޓްރީން ބުނީ މި މަޝްރޫޢުގެ ސަބަބުން ރާއްޖޭގެ ރަށްތަކުގެ ފެހިކަން އިތުރުވެ، ވައި ސާފުވެ، ދިރޭތަކެތީގެ ނަސްލުތައް ހިމާޔަތްކުރެވޭނެކަމަށެވެ.
މި މަޝްރޫޢުގައި ރައްޔިތުންގެ ބައިވެރިވުން އިންތިހާއަށް މަތިކަމަށް ފާހަގަކުރެވޭ ކަމަށާއި، ސްކޫލް ކުދިންނާއި، ޖަމްޢިއްޔާ ޖަމާޢަތްތަކާއި، އަމިއްލަ ފަރުދުން މި މަސައްކަތުގައި ބައިވެރިވަމުންދާ ކަމަށް އެ މިނިސްޓްރީން ވަނީ ބުނެފައެވެ. ފަސް މިލިއަން ގަސް އިންދުމުގެ މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާދެއްވި މަޝްރޫއުއެކެވެ. މި މަޝްރޫޢުގެ މަގްސަދަކީ ރާއްޖެފެހިކޮށް، ކާބަން ޑައިއޮކްސައިޑް މަދުކޮށް، މޫސުމަށް އަންނަ ބަދަލުތަކާ ކުރިމަތިލުމަށް މަގުފަހިކުރުމެވެ.
ސަރުކާރުން ކުރިއަށްގެންދާ ފަސް މިލިއަން ގަސް އިންދުމުގެ ޕްރޮގްރާމްގެ ދަށުން މިހާތަނަށް 490,000 އަށްވުރެ ގިނަ ގަސް ވަނީ އިންދާފައެވެ.
