ބްރޯޑްކާސްޓިން ކޮމިޝަނުން ހުސްވެފައިވާ ދެ ގޮނޑިއަށް ބޭފުޅުން އައްޔަންކުރަން މަޖިލީހަށް ފޮނުވި ލިސްޓުގައި އޭއޯ ނިއުސްގެ ސީއީއޯ ޝިމްލާ އަޙްމަދުގެ ނަން ހިމެނިއްޖެއެވެ.
އެ ކޮމިޝަންގެ ދެ މެމްބަރެއްގެ ދައުރު މިދިޔަ މަހު ހަމަވުމުން އެ މަގާމުތަކަށް ކުރިމަތިލާން ހުޅުވާލުމުން ކުރިމަތި ލެއްވެވި 12 ބޭފުޅުންގެ ތެރެއިން ރައީސުލް ޖުމުހޫރިއްޔާ އިސްކަން ދެއްވަވާ ތަރުތީބު ބަޔާން ކުރައްވައި، މަޖިލީހަށް ފޮނުއްވެވި ލިސްޓްގައި ޝިމްލާ ހިމެނިފައި އޮތީ 8 ވަނައިގައެވެ.
ނަމަވެސް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ހުރިހާ ބޭފުޅުންނާއި ކުރެއްވެވި އިންޓަވިއު އަށް ފަހު ނެރުނު ރިޕޯޓުގައި ޝިމްލާގެ ނަން އޮތީ 77 އިންސައްތަ އާއެކު 4 ވަނައިގައެވެ. ބްރޯޑްކޮމް އަށް އައްޔަންކުރަން ގާބިލް ކަމަށް ކޮމިޓީން ބަލާފައި ވަނީ 75 ޕަސެންޓަށްވުރެ މަތިން މާކްސް ލިބިވަޑައިގަތް ބޭފުޅުންނެވެ.
ޝިމްލާ ވަނީ 2011 ވަނަ އަހަރު އައްޑޫގައި އަމިއްލަ އޮންލައިން ނޫސް މީޑިއާއެއް އުފައްދަވައި އަދި ވަކިން ޚާއްޞަކޮށް ޒުވާނުންނާއި ސްކޫލްތަކުގެ ދަރިވަރުން ނޫސްވެރިކަމަށް އަހުލުވެރިކުރުވުމަށް އަމިއްލައަށް އިސްނަންގަވައިގެން ރާއްޖޭގެ އެކިސަރަޙައްދުތަކުގައި ތަމްރީނު ޕްރޮގްރާމްތައްހިންގަވާ ގިނަ ޒުވާނުން ނޫސްވެރިކަމުގެ ދާއިރާއަށް ނެރެދެއްވަވާފައެވެ.
2020 ވަނަ އަހަރުން ފެށިގެން ކޮމިޔުނިޓީ ބްރޯޑްކާސްޓިންގެ ދާއިރާއަށް ޒުވާނުން އަހުލުވެރިކުރުމުގެ މަސައްކަތް ކުރައްވަވާ ޝިމްލާ ވަނީ ދެކުނުގެ 4 އަތޮޅުގައި އަތޮޅު ބަހުރުވައިން ޓީވީ ޚަބަރު ހުށަހަޅައިދޭނެ ޒުވާނުން ތަމްރީނުކޮށް އެމަސައްކަތް ވެސް ކުރައްވަވާފައެވެ.
ނޫސްވެރިކަމުގެ ދާއިރާގައި ވަކިން ޚާއްޞަކޮށް ދާއިރާގައި މީހުން ބިނާކުރުމަށް ކުރެވުނު ކާމިޔާބު މަސައްކަތް ތަކާއެކު ޝިމްލާއަށް ވަނީ 2022 ވަނަ އަހަރު ރެހެންދި އެވޯޑު ވެސް ދެއްވަވާފައެވެ. މީގެ އިތުރުން ވިމެންއިން މީޑިއާގެ “މީޑިއާ ވުމެން އޮފްދަޔިއަރ ” ގެ އެވޯޑް ވެސް 2022 ވަނަ އަހަރު ޝިމްލާއަށްވަނީ ދެއްވަވާފައެވެ.
ސައުތު އޭޝިއާގެ އަންހެން ނޫސްވެރިންގެ ޖަމިއްޔާ އެއްކަމަށްވާ “ސައުތު އޭޝިއަން ވިމެން އިން މީޑިއާ” ގެ ރާއްޖެ ތަމްސީލްކުރައްވަވާ ކައުންސިލްމެމްބަރުގެ ގޮތުގައި މިހާރުވެސް ޝިމްލާމަސައްކަތް ކުރައްވަވަމުން އަންނަ އިރު ދެކުނު އޭޝިއާގެ އަންހެން ނޫސްވެރިންނަށް އަރުވާ “ސައުތު އޭޝިއާ ލާޑްލީ މީޑިއާ އެންޑް އެޑްވަޓައިޒިންގ އެވޯޑްސް ފޯރ ޖެންޑަރ ސެންސިޓިވިޓީގެ “ގެ ފާއިތުވި ދެ އަހަރުގައި ވެސް ފަނޑިޔާރުންގެ ޕެނަލްގައި ޝިމްލާ ވަނީ މަސައްކަތް ކުރައްވަވާފައެވެ.
ޝިމްލާ ފާހަގަ ކޮށްލެވެނީ މިންތީގެ ހަމަހަމަނޫސްވެރިކަމެއް ގާއިމުކުރުމަށް މަސައްކަތް ކުރާ ފަރާތެއްގެ ގޮތުގައެވެ.
ނޫސްވެރިކަމުގެ މަސައްކަތުގެ އިތުރުން ދަރުމަވެރި މަސައްކަތް ތަކުގައި އިސްކޮށް މަސައްކަތް ކުރައްވަވާ ރާއްޖޭގެ ފުރަތަމަ ސަރަޙައްދީ ޖަމިއްޔާ ގެކޯފައުންޑަރ އަދި ރައީސާގެ ގޮތުގައި ކާމިޔާބު ގިނަ މަސައްކަތްތަކެއްވެސް މުޖުތަމައަށް ޝިމްލާދަނީ ކުރައްވަވަމުންނެވެ.
ބްރޯޑްކޮމް އަށް އައްޔަންކުރަން ގާބިލް ކަމަށް ކޮމިޓީން ބަލާފައި ވަނީ 75 ޕަސެންޓަށްވުރެ މަތިން މާކްސް ލިބިވަޑައިގަތް ބޭފުޅުންނެވެ.
އިންޓަވިއުތަކަށް ފަހު، 75 ޕަސެންޓަށް ވުރެ ގިނަ މާކްސް ލިބިވަޑައިގަތް ބޭފުޅުންގެ ތެރެއިން އައްޔަންކުރާނެ ބޭފުޅަކު ކަނޑައަޅަން މަޖިލީހުން ދައުރުން ބޭރުގައި ބާއްވާ ޖަލްސާއެއް ޖެނުއަރީ 16 ވާ ބުރާސްފަތި ދުވަހަށް ވަނީ ތާވަލްކޮށްފަ އެވެ. އަދި އެ ޖަލްސާއިން ހޮވޭ 2 ބޭފުޅަކު ޖެނުއަރީ 17 އިން ފެށިގެން މަގާމާއި ހަވާލު ވާން ގާނޫނު ލާޒިމު ކުރެއެވެ.
