ދާދި ފަހުން ޓްވިންކަލް ކަންނާ ވަނީ ލަންޑަނަށް ބަދަލުވުމާއި ހުވަފެންތައް ހަގީގަތަކަށް ހެދުމަށް ފިރިމީހާ އަކްޝޭ ކުމާރު ސަޕޯޓް ކުރި ގޮތާ ބެހޭ ގޮތުން ވާހަކަ ދައްކާފައެވެ. ޓްވިންކަލް ލަންޑަންގެ ޔުނިވާސިޓީއަކުން ޑިގްރީ ހާސިލް ކުރީ 2024 ވަނަ އަހަރުގެ ޖެނުއަރީ މަހުއެވެ.
1995 ވަނަ އަހަރު ބަރުސާތު އިން ބޮލީވުޑަށް ތައާރަފްވި ޓްވިންކަލް ވަނީ މެލާ، ޖޯރޫ ކާ ޣުލާމް، އަދި ބާދުޝާހް ފަދަ ފިލްމުތަކެއްގައި މަސައްކަތްކޮށްފައެވެ. ސިލްވަރ ސްކްރީންތަކާ ދުރުގައި ހުންނަތާ ދުވަސްކޮޅެއް ވެފައިވާއިރު، އޭނާ އަންނަނީ ލިޔުންތެރިކަމުގެ ދާއިރާއިން ކުރިއަށް ދިއުމަށް މަސައްކަތްކުރަމުންނެވެ. ކުރީގެ ބަތަލާއަކީ މިހާރު ލިޔުންތެރިއެއްގެ އިތުރުން ފިލްމު ޕްރޮޑިއުސަރެކެވެ. ޓްވިންކަލް ދާދި ފަހުން ވަނީ އެމީހުންގެ އަންހެން ދަރިފުޅު ނިތާރާއާ އެކު ލަންޑަނަށް ބަދަލުވުމުގައި އަކްޝޭ ކުމާރު ސަޕޯޓް ކުރި ކަމަށް ބުނެ އޭނާގެ ނަސީބު ވަރަށް ރަނގަޅު ކަމަށް ބުނެފައެވެ.
އަބަދުވެސް ވަރަށް މިނިވަންކަމާއެކު، އުޅެމުން ދިޔަ ޓުވިންކަލް ބުނީ އަންހެން ދަރިފުޅު ނިތާރާއާ އެކު އެހެން ގައުމަކަށް ބަދަލުވުން ފިރިމީހާ އަކްޝޭ ކުމާރަށް އެއްވެސް މައްސަލައެއް ދިމާނުވުމަކީ ފުދޭވަރަކަށް ނަސީބުވެރި ކަމެއްކަމަށެވެ. އިތުރަށް ޓުވިންކަލް ބުނީ އެކްޝާ އެކަމަށް އެއްބަސްނުވި ނަމަވެސް އެ ލަންޑަނަށް ބަދަލުވާނެކަމަށެވެ. އެހެންނަމަވެސް އެކަމުގައި އެއްވެސް ހިތްހަމަނުޖެހުމެއް ނެތި އޭނާގެ ނިންމުމަށް އަކްޝޭ ތާއިދުކުރިކަން ފާހަގަކޮށް ޓުވިންކަލް ވަނި އެ ނިންމުމަށް އާއިލާއިން ކުރި ތާއީދުގެ ސަބަބުން ހިތްހަމަޖެހުން ލިބުނުކަން ހާމަކޮށްފައެވެ.
އުމުރުން 49 އަހަރުގައި ތައުލީމު ކުރިއަށް ގެންދަން ޓްވިންކަލް ނިންމިއިރު، ކުރީގެ ބަތަލާ ވަނީ ކޮވިޑް-19 ގެ ދުވަސްވަރު ކުރު މުއްދަތުގެ އޮންލައިން ކޯސްތައް ކުރިއަށް ގެންގޮސްފައެވެ. އޭގެ ފަހުން ފުލްޓައިމް ދަރިވަރެއްގެ ގޮތުގައި ދަތުރު ފެށި ޓުވިންކަލް ޔުނިވާސިޓީ އޮފް ލަންޑަންގެ ގޯލްޑްސްމިތުސް އިން މާސްޓާސް ޑިގްރީ ވަނީ ފުރިހަމަކޮށްފައެވެ.
