ފިހާރައަކުން 600 ރުފިޔާގެ ވިޔަފާރި ކުރުމަށްފަހު، ފޭކު ޓްރާންސްފާ ސްލިޕެއް ފޮނުވި މީހަކު ނުވަ މަހާއި 18 ދުވަހަށް ޖަލަށްލުމަށް ކްރިމިނަލް ކޯޓުން ހުކުންކޮށްފިއެވެ.
މި މައްސަލައިގައި ހުކުމް އިއްވީ، ހއ. ހޯރަފުށީ އާސްތާނާގޭ އިބްރާހީމް ބައްޝާރުގެ ހަމީދުގެ މައްޗަށެވެ.
2022ވަނަ އަހަރުގެ ޖުލައި 23ގައި، މާލޭ ކިނބިގަސްމަގުގައި ހުންނަ “އިފާންޓްރޭޑް” ފިހާރައަށް ނެސްކެފޭ ޕައުޑަރު 500 ގްރާމުގެ ތިން ދަޅާއި ބޮޑު އެކްސްއެލް ދަޅެއް ނެގުމަށް ފަހު އެ ތަކެތީގެ އަގަށްވާ 600 ރުފިޔާގެ ފޭކު ސްލިޕެއް ދެއްކި މައްސަލައިގައިދައުލަތުން ބައްޝާރުގެ މައްޗަށް ކޮށްފައިވަނީ އެނގިހުރެ ސައްހަނޫން ލިޔުމެއް ދިނުމުގެ ކުށުގެ ދައުވާއެވެ.
މި މައްސަލައިގައި ދައުވާއަށް އިންކާރުކުރަމުން ކޯޓުގައި އޭނާބުނީ، ޓްރާންސްފާ ފޮނުވާފައިވާ ސިމްގެ ރަޖިސްޓްރީ ނަންބަރު އިންނަނީ އޭނާގެ ނަންމަތީގައި ނޫން ކަމަށެވެ. މި މައްސަލައިގައި ދައުލަތުން ހުށަހެޅި ހެކީގެ ތެރޭގައި އެ ފިހާރައިގެ ސީސީޓީވީ ފުޓޭޖު ހިމެނެއެވެ.
ދައުލަތުން ހުށަހެޅި ހެކިތަކާއެކު ކޯޓުން ނިންމީ ބައްޝާރުގެ މައްޗަށް މި ދައުވާ ސާބިތުވާ ކަމަށެވެ.
