ހައުސިން މިނިސްޓްރީ ހުންނަ އިމާރާތު އަލިފާން ރޯވުމާ ގުޅިގެން ދުން ފެތުރެމުންދާތީ ސަމާލުވުމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކޮށްފިއެވެ.
މިއަދު ހެނދުނުގެ ވަގުތެއްގައި މި އިމާރާތުގައި އަލިފާން ރޯވުމުގެ ސަބަބުން މުޅި މާލެ ތެރެއަށް ދުމުގެ އަސަރުވަނީ ކޮށްފައެވެ. ދުން ފެތުރެމުންދާތީ ސަމާލުވުމަށް އިލްތިމާސްކޮށް އެޗްޕީއޭއިން ވަނީ ކޮންމެހެން ނުކުންނަން ޖެހިއްޖެ ހާލަތެއްގައި މެނުވީ ދުމުގެ އަސަރުކޮށްފައިވާ ސަރަހައްދަކަށް ނުނިކުތުމަށް އިލްތިމާސްކޮށްފައެވެ.
މީގެ އިތުރުން ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުމަށް އެދިފައިވާއިރު ނޭވާލާ ނިޒާމް އަދި ހިތުގެ ބަލިތައް ހުންނަ ފަރާތަތްކަށް ދުމުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވާކަމަށް އެޗްޕީއޭއިން ވަނީ ބުނެފައެވެ. އަދި ގޭގެ ދޮރުތަކާއި ކުޑަދޮރުތައް، ދުން ނުވަންނާނެހެން ބަންދުކުރުމަށް އެޗްޕީއޭއިން ވަނީ އެދިފައެވެ.
އިތުރަށް އެޗްޕީއޭއިން ވަނީ ނޭވާ ކުރުވުން / ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯއްދުމަށް އެޗްޕީއޭއިން ވަނީ އިލްތިމާސްކޮށްފައެވެ.
