އެހެން އަހަރުތަކުގައި، އެކި އިންތިޚާބުތަކާ ދިމާކޮށް ބޮޑެތި ޢަދަދުތަކުން ގައިދީން މިނިވަންކުރަމުންދިޔަ ނަމަވެސް، މި ނިމުނު އަހަރު ތެރޭ، މުޅި އަހަރަށް ބަހާލައިގެން، ޤާނޫނުގައި އޮންނަ ފުރުޞަތުތަކުގެ ތެރެއިން އަދަބު ލުއިކޮށް، ދޫކޮށްލާފައި ވާނީ ޖުމުލަ 86 މީހުންކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މި ހިނގާ ޑިސެމްބަރު މަހު ވަޒީރުންގެ މަޖިލީހުން ފާސްކުރި، ޖަލުތަކުގައި ޙުކުމް ތަންފީޒުކުރަމުންދާ ގައިދީންނަށް ހިންގޭ ރީހެބިލިޓޭޝަން ޕްރޮގްރާމްތަކަށް ބަދަލު ގެނެސް، އެ ޕްރޮގްރާމްތަކާއި ގުޅުވައިގެން ހުކުމަށް ލުއި ދިނުމާއި، ހުކުމް މައާފުކޮށްދިނުމުގެ ފުރުސަތު ފަހިކޮށްދިނުމަށް ރަސް ނިންމަވި ނިންމެވުމަށް އިޝާރާތްކުރައްވާފައެވެ. މި ސަރުކާރުން އިސްކަންދޭނީ ތަރައްގީ އާއި ހަމަޖެހުމަށްކަމަށާއި، ސިޔާސީ ވިސްނުމެއްގައި ބަދަލުހިފުމުގެ ރޫޙެއްގައި މަސައްކަތްނުކުރައްވާނޭކަމަށް އެމަނިކުފާނު ވިދާޅުވިއެވެ.
އެގޮތުން، ސިޔާސީ ފައިދާ ހޯދުމަށްޓަކައި އެކި އިންތިހާބުތަކާ ދިމާކޮށް ޖަލުތަކުގައި ތިބޭ ކުށްވެރިން ރިހެބިލިޓޭޓްނުކޮށް ދޫކޮށްލުމުގެ ޘަޤާފަތް، މި ސަރުކާރުން ނައްތާލާފައިވާކަމަށް އެމަނިކުފާނު ވިދާޅުވިއެވެ.
އަރިއަތޮޅު އުތުރުބުރިއާ މާލެ އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން ތޮއްޑޫގައި ބޭއްވި މި ބައްދަލުވުމާއެކު ރައީސުލްޖުމްހޫރިއްޔާ މި ވަނީ 170 ކައުންސިލާ ބައްދަލުކުރައްވާފައެވެ. ރައްޔިންނާ ގާތުން ވެރިކަން ކުރުމަށް ރައީސުލްޖުމްހޫރިއްޔާ ގެންގުޅުއްވާ ސިޔާސަތުގެ ދަށުން، އިންތިޚާބުވެފައިތިއްބެވި ބޭފުޅުން ރައީސުލްޖުމްހޫރިއްޔާގެ އަރިހަށް ގެނައުމުގެ ބަދަލުގައި، އިންތިޚާބީ ދާއިރާތަކަށް ވަޑައިގެން ރައްޔިތުންގެ އަޑުއެއްސެވުމަކީ އެމަނިކުފާނު އިސްކަންދެއްވާ އުޞޫލުކަން، މިއަދުވެސް އެމަނިކުފާނު ފާހަގަރެއްވިއެވެ
