2025 ވަނަ އަހަރާއި 2026 ވަނަ އަހަރު ވެގެންދާނީ، ރިޔާސީ އިންތިޚާބުގައި ރަށްރަށަށް ވަޑައިގެން ވެވަޑައިގެންފައިވާ ވަޢުދުތައް ފުއްދެވުމުގެ ޢަމަލީ މަސައްކަތް ހިނގާނޭ ދެ އަހަރަށް ކަމަށް، ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، އަރިއަތޮޅު އުތުރުބުރިއާ މާލެ އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގައި، އއ ތޮއްޑޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
މި ނިމޭ 2024 ވަނަ އަހަރު ރައްޔިތުން އުންމީދުކުރި މިންވަރަށް މަސައްކަތްތައް ކުރިއަށް ނުދިޔަ ސަބަބުތަކަކީ ފޮރުވިފައިވާ ކަމެއް ނޫންކަން ފާހަގަކުރައްވަމުން އެމަނިކުފާނު ވިދާޅުވީ، 2024 ވަނަ އަހަރު ސަރުކާރުން ތަންފީޒުކުރަން ޖެހިވަޑައިގަތީ، މިދިޔަ ސަރުކާރުގެ ފިނޭންސް މިނިސްޓަރު، މި ދިޔަ ސަރުކާރުގެ އަޣުލަބިއްޔަތު އޮތް މަޖިލީހަކަށް ހުށަހަޅުއްވައިގެން، އިންތިޤާލީ މަރުޙަލާގެ ހުށަހެޅުންތަކަށް ރިޢާޔަތްކުރުމެއް ނެތި، މަސައްކަތް ކުރިއަށް ނުގެންދެވޭގޮތަށް، ފާސްކުރި ބަޖެޓެއް ކަމަށެވެ.
“އެހެންވީމާ ސަރުކާރަށް މި އަހަރުތެރޭގައި މަސައްކަތްތައް ކުރުމުގައި ދިމާވި އެންމެ ބޮޑު ހުރަހަކަށްވީ، ސިޔާސީ ވިސްނުމެއްގައި، މި ސަރުކާރަށް އުނދަގޫ ކުރުމަށްޓަކައި، އޭރުގަ އޮތް މަޖިލީހުން ފާސްކޮށްފައި އޮތް ބަޖެޓު. އިރާދަކުތެއްވިއްޔާ އެކަން މިހާރު މި ނިމުނީ،” ރައީސް ވިދާޅުވިއެވެ. ދެން ތަންފީޒުކުރަން ފައްޓަވާނީ، މި ސަރުކާރުން ރައްޔިތުންނަށްޓަކައި ވެވަޑައިގެންފައި ހުރި ވަޢުދުތައް ފުއްދެވުމަށްޓަކައި މި ސަރުކާރުގެ އަޣުލަބިއްޔަތު އޮތް މަޖިލީހުން ފާސްކުރެއްވި ބަޖެޓުކަމަށް އެމަނިކުފާނު ވިދާޅުވިއެވެ. އަދި ކުރިއަށް އޮތް ދެ އަހަރުދުވަހުގެ ތެރޭގައި އިރާދަކުރެއްވިއްޔާ މުޅި ރާއްޖޭގެ ހުރިހާ ކަންކޮޅެއްގައި، ބަހާލެވިގެން، ތަރުތީބެއްގެ ތެރެއިން، ރިޔާސީ ހުރިހާ ވަޢުދެއްގެ މަސައްކަތް ޢަމަލީގޮތުން ފަށްޓަވައި، އެކި މަޝްރޫޢުތައް ނިމެމުންވެސް ދާނެކަމުގެ ޔަޤީންކަން އެމަނިކުފާނު ދެއްވިއެވެ.
މީގެ އިތުރުން ރައީސް ވަނީ ބިނާރާއި ޢުމްރާނީ ތަރައްގީގެ އިތުރުން މުޖުތަމައުގެ ހަމަޖެހުމަށްވެސް ސަރުކާރުން ދެއްވާ އަހަންމިއްޔަތު ފާހަގަކުރައްވާފައެވެ.
.
