ނ. ހޮޅުދޫގައި ޒަހަމްތަކަކާއެކު ނިޔާވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލައިގައި އެއްވެސް މީހެއްގެ ބައިވެރިވުމެއް އޮތް ކަން މިހާތަނަށް ފާހަގަ ކުރެވިފައިނުވާ ކަމަށް ފުލުހުން ބުނެފިއެވެ.
މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓަރ އޮފް ޕޮލިސް މުހައްމަދު ސާމިހު ވިދާޅުވީ، މި ހާދިސާއާ ގުޅިގެން ޒަކިއްޔާގެ ހަށިގަނޑު ބެލި ބެލުމުން އޭނާގެ ކަރުގެ ދެފަރާތަކަށް، ކަނާތް އައި ވައަތް ފަރާތަށް ތޫނު އެއްޗެކުން ލިބިފައި ހުރި އަނިޔާގެ ގިނަ ޒަހަމްތަކެއް ފެންނަން ހުރިކަމަށެވެ. އެގޮތުން ކަރުގެ ވައަތް ފަޅީގައި ފުން ތިން ޒަހަމެއް އަދި ކަނާތް ފަރާތުގައި ފުން ދެ ޒަހަމެއް ހުރިކަމަށް ފުލުހުން ވަނި ބުނެފައެވެ. މީގެ އިތުރުން ކަރުގައި މެދާއި ހިސާބުގައި ތިލަކޮށް ހުރި އެއް ޒަހަމް ހުރި ކަމަށް ސާމިހު ވިދާޅުވިއެވެ.
މި ހާދިސާއާ ގުޅިގެން ޒަކިއްޔާގެ މަރުގެ ހަގީގަތް ދެނެގަތުމަށް، އިތުރަށް ބަލަން ޖެހޭ ބެލުންތައް ބެލުމުގެ ގޮތުން އޭނާގެ ހަށިގަނޑު އެރޭ މާލެ ގެނެސް ޕެތޮލޮޖިސްޓް ޑޮކްޓަރެއް ހަށިގަނޑު ބަލާފައިވާ ކަމަށް ސާމިހު ވިދާޅުވިއެވެ. އަދި ޖެހިގެން އައި ދުވަހު ހަށިގަނޑު އަނބުރާ ހޮޅުދޫއަށް ގެންދެވި އާއިލާ ހަވާލުކޮށް އެ ދުވަހު ހަށިގަނޑު ވަޅުލެވިފައިވާކަމަށް ސާމިހު ވިދާޅުވިއެވެ.
މީގެ އިތުރުން ސާމިހު ވިދާޅުވީ މި ހާދިސާއާ ގުޅިގެން އެކިއެކި ތުހުމަތުތައް ކުރެވޭއިރު، އެފަދަ ސުވާލު އުފެދޭ ކަންކަމުގެ ހަގީގަތް ދެނެގަތުމަށް ތަހުގީގު ކުރެވެން ހުރި ހުރިހާ މަސައްކަތްތަކެއް ކުރެވިފައިވާ ކަަމަށެވެ. އެގޮތުން ނަރުދަމާ ނިޒާމްގެ ތެރެއިން ފެނުނު ބުރުގާއަކީ، ޒަކިއްޔާގެ އެއްޗެއްތޯ ބެލުމަށް ހިންގި ތަހުގީގުން އެއީ އޭނާ އަޅާ ބުރުގާއެއް ނޫންކަން އެގިފައިވާކަމަށް ސާމިހު ވިދާޅުވިއެވެ. އަދި ސީނުން ފެނުނު ވަޅީގައި ލޭގެ އަސަރު ނެތް ކަމަށް ދެކެވެމުންދާ ވާހަކަތައް ދޮގުކޮށް ސާމިހު ވިދާޅުވީ އެ ވަޅީގައި ގިނަ އަދަދަކަށް ލޭ ހުރި ކަމަށެވެ. އިތުރަށް ސާމިހު ވިދާޅުވީ އަދި މި މައްސަލައާ ގުޅިގެން ސީޓީ ސްކޭނެއްވެސް ހެދިފައިވާއިރު، އޭގެ ނަތީޖާއިންވެސް ޒަކިއްޔާގެ ހަށިގަނޑުން، އަނިޔާއެއް ނުވަތަ ސުވާލު އުފެދޭ ކަމެއް ފެނިފައި ނުވާކަމަށެވެ.
