އިޒްރޭލު ޕާސްޕޯޓްގައި ރާއްޖެއަށް އެތެރެވުން މަނާކުރުމުގެ މައްސަލައިގައި ފަލަސްތީނާއި އަރަބި ގައުމުތަކުގެ ލަފާ ހޯދަންޖެހޭ ކަމަށް އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާހް ވިދާޅުވެއްޖެއެވެ.
އިޒްރޭލު ޕާސްޕޯޓް މަނާކުރުމުގެ މައްސަލައިގައި ސަލާމަތީ ހިދުމަތްތަކާއި ބެހޭ ކޮމިޓީގައި ވާހަކަދައްކަވަމުން ފަލާހް ވިދާޅުވީ އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާކުރުމަކީ ވަރަށް މުހިންމު އިސްލާހެއް ކަމަށެވެ. އަދި ފަލަސްތީނުގެ ރައްޔިތުންނާ މެދު އިޒްރޭލުން ހިންގަމުންގެންދަނީ ވަރަށް ވަރުގަދަ ލާއިންސާނީ، އަނިޔާވެރި ގަތުލްއާންމުގެ އަމަލުތަކެއްކަމަށް ފަލާހް ވިދާޅުވިއެވެ.
ރާއްޖެއަށް އިޒްރޭލުގެ ރައްޔިތުން އައުން މަނާ ކުރުމަށް، ފަލަސްތީނުން ބޭނުންވާނަމަ އެ ގައުމަށް އެކަމުގައި ކިހާ މަންފާއެއް، ފައިދާއެއް ހުރިތޯ ނުވަތަ ލިބޭނެ ހިތްހަމަޖެހުމާއި އުފާވެރިކަން އޮތްތޯ ބަލަން ޖެހޭކަމުގައި ފަލާހް ވިދާޅުވިއެވެ.
މީގެ އިތުރުން ފަލާހް ވިދާޅުވީ އިޒްރޭލުގެ ޕާސްޕޯޓް މަނާކުރުމަކީ ސިޔާސީ ގޮތުން ގައުމަށް ގެއްލުން ހުރި ކަމަކަށް ވެގެން ނުވާނެ ކަމަށެވެ. އެހެންކަމުން އެކަމާ މެދު ފުޅާ ދާއިރާގައި މަޝްވަރާ ކުރަން ޖެހޭ ކަމަށެވެ.
