ޑަބްލިއުޑީސީ ބެޑްމިންޓަން ފިއެސްޓާ 2024ގެ ނަމުގައި އައްޑޫސިޓީގެ ޓީމްތަކުގެ މެދުގައި ބާއްވާ ބެޑްމިންޓަން މުބާރާތުގެ ސެމީފައިނަލުގެ 2 މެޗް މިރޭ ކުޅޭނެއެވެ.

މިރޭ ކުޅޭ ސެމީ ފައިނަލްގެ ފުރަތަމަ މެޗްގައި ވާދަކުރާނީ ބޭރުމަތި ސްޕޯޓްސް ކްލަބާއި ޓީމް މަލާ އެވެ. މިމުބާރާތުގައި މިހާތަނަށް އެންމެ ގިނަ ޕްއިންޓްހޯދައިގެން ތާވަލުގެ އެންމެ މަތިން ޖާގަ ހޯދާފައިވަނީވެސް ބޭރުމަތި ސްޕޯޓްސް ކްލަބުންނެވެ. އެޓީމް ސެމީއަށް ދިޔައީ 48 ޕޮއިންޓާއެކުއެވެ. ވަރަށް ކުޑަ ތަފާތަކާއެކު، އެޓީމާއި ވާދަކުރާ މަލާ ޓީމް ސެމީއަށްދިޔައީ 43 ޕޮއިންޓާއެކުއެވެ. ކުޅަދާނަ މޮޅު ކުޅުންތެރިން 2 ޓީމުންވެސް ފެނިގެންދާ ސެމީ ފައިނަލްގެ މިމެޗް ވެގެންދާނީ ފޯރިގަދަ މެޗަކަށެވެ.

AD

ޑަބްލިއުޑީސީ ބެޑްމިންޓަން ފިއެސްޓާގެ ސެމީ ދެވަނަ މެޗްގައި ވާދަކުރާނީ ޝަޓްލް ފައިޓާސް އާއި ޓްރީޑީ ސްޕޯޓްސް އެކަޑަމީއެވެ. ސެމީއަށް ޝަޓްލް ފައިޓާސް ދިޔައީ 28 ޕޮއިންޓާއެކުއެވެ. ޓްރީޑީ ސްޕޯޓްސް އެކަޑަމީއަށް ލިބިފައިވަނީ 24 ޕޮއިންޓެވެ. މި މުބާރާތުގައި 21 ޕޮއިންޓާއެކު ތާވަލުގެ އެންމެ ފުލުން ޖާގަހޯދި ރޮކެޓް ރޯޔަލްސް ވަނީ މުބާރާތުން ބަލިވެފައެވެ.

މި މުބާރާތުގެ މެޗްތައް ހަމަޖެހިފައިވާ ގޮތުން ކޮންމެ މެޗެއްގައިވެސް 7 ޓައި ކުޅޭނެއެވެ. އެއީ މެންސް ސިންގަލްގެ 1 ޓައި،ވިމެންސް ސިންގަލް 1ޓައި ، ވިމެންސް ޑަބަލްގެ 2 ޓައި، މެންސް ޑަބަލްގެ 2 ޓައި،އަދި މިކްސް ސިންގަލްގެ 1 ޓައި އެވެ. މޮޅުވާ ކޮންމެ ޓައި އަކުން ޓީމަށް 3 ޕޮއިންޓް ލިބޭއިރު ޓައި އިން ބަލިވެއްޖެނަމަ ލިބެނީ 1 ޕޮއިންޓެވެ. އަދި މުޅި މެޗުން އެންމެ ގިނަ ޕޮއިންޓް ހޯދައިގެން ކާމިޔާބު ކުރާ ޓީމަށް އިތުރު 5 ޕޮއިންޓް ލިބެއެވެ.

މި މުބާރާތުގައި ވަނީ ޖުމްލަ 5 ޓީމެއް ބައިވެރިވެފައެވެ. މުބާރާތް ކުރިއަށްދަނީ އައްޑޫސިޓީ ބެޑްމިންޓަން އެރީނާގައެވެ. މި މުބާރާތުގެ ފައިނަލް މެޗްކުޅޭނީ މާދަމާ ރެއެވެ. މި މެޗް “ވަގުތުންލައިވް” ގެ ފޭސްބުކު ޕޭޖް އިން ވަގުތުން ގެނެސްދޭނެއެވެ.

މިއީ ޑަބްލިއުޑީސީން މުޅި އައްޑޫސިޓީއަށް އަމާޒުކޮށްގެން މިފަދަ މުބާރާތެއް ބާއްވާ ފުރަތަމަ ފަހަރެވެ. އަންހެނުންނަށް ބެޑްމިންޓަންގެ ރޮނގުން ވާދަވެރި މާޙައުލެއް ހޯދައިދިނުމާއެކު، އައްޑޫގައި ބެޑްމިންޓަންގެ މަޤްބޫލުކަން އިތުރުކޮށް، ކުޅިވަރުގެ ރޫޙާއި އެއްގޮތަށް މިކުޅިވަރު ކުޅުމަށް ހިތްވަރުދީ، ކުޅުންތެރިންގެ ފެންވަރު ވަޒަންކޮށް، ހުނަރު ތަރައްޤީކޮށްދީގެން މިކުޅިވަރަށް ޝައުގު އުފައްދައި، ކުޅުންތެރިންގެ މެދުގައި އެކުވެރިކަމުގެ ރޫޙު އާލާ ކުރުމާއެކު އިޖުތިމާޢީ ގުޅުން ބަދަހިކުރުމުގެ މަޤްޞަދުގައި ޑަބްލިއުޑީސީން ބާއްވާ މުބާރާތަކަށް ވެފައި ލިބުނު ތަރުޙީބާއެކު މިފަދަ ތަފާތު މުބާރާތްތައް ކުރިއަށް އޮތްތާނގައިވެސް ބާއްވާނެ ކަމަށް ޑަބްލިއުޑީސީގެ ރައީސާ ނުސްރާ ރަޝީދު ވިދާޅުވިއެވެ.

ޑަބްލިއުޑީސީން މިމުބާރާތް ކުރިއަށް ގެންދަނީ ، ދޮންނާ ޓްރޭޑާސް އާއި އައްޑޫ ބެޑްމިންޓަން ކްލަބް ގުޅިގެންނެވެ. މިމުބާރާތާ ގުޅޭ ޚަބަރާއި މަޢުލޫމާތު ވަގުތުންލައިވް އަދި އޭއޯނިއުސްއިން ގެނެސްދޭނެއެވެ.