އައްޑޫސިޓީ ޑަބްލިއުޑީސީ ބެޑްމިންޓަން ފިއެސްޓާ 2024 ގެ ނަމުގައި ކުރިއަށް ގެންދާ ބެޑްމިންޓަން މުބާރާތް މާދަމާ ފަށާނެއެވެ. ޑަބްލިއުޑީސީން މިމުބާރާތް ކުރިއަށް ގެންދަނީ ، ދޮންނާ ޓްރޭޑާސް އާއި އައްޑޫ ބެޑްމިންޓަން ކްލަބް ގުޅިގެންނެވެ.
މިއީ އައްޑޫސިޓީގެ އަންހެނުންނަށް ބެޑްމިންޓަންގެ ރޮނގުން ވާދަވެރި މާޙައުލެއް ހޯދައިދިނުމާއެކު، އައްޑޫގައި ބެޑްމިންޓަންގެ މަޤްބޫލުކަން އިތުރުކޮށް، ކުޅިވަރުގެ ރޫޙާއި އެއްގޮތަށް މިކުޅިވަރު ކުޅުމަށް ހިތްވަރުދީ، ކުޅުންތެރިންގެ ފެންވަރު ވަޒަންކޮށް، ހުނަރު ތަރައްޤީކޮށްދީގެން މިކުޅިވަރަށް ޝައުގު އުފައްދައި، ކުޅުންތެރިންގެ މެދުގައި އެކުވެރިކަމުގެ ރޫޙު އާލާ ކުރުމާއެކު އިޖުތިމާޢީ ގުޅުން ބަދަހިކުރުމުގެ މަޤްޞަދުގައި ޑަބްލިއުޑީސީން ބާއްވާ މުބާރާތެކެވެ.
މި މުބާރާތް އޮންނާނީ ނޮވެންބަރ 8 އިން 12 ވަނަ ދުވަހުގެ ނިޔަލަށެވެ.
މި މުބާރާތުގައި އައްޑޫ ސިޓީއަށް ނިސްބަތްވާ 5 ޓީމަކުން ވާދަކުރެއެވެ. އެއީ މަލާ ޓީމް، ބޭރުމަތި ސްޕޯޓްސް ކްލަބް، ޓްރީޑީ ސްޕޯޓްސް އެކަޑަމީ، ރޮކެޓް ރޯޔަލްސް، އަދި ޝަޓްލް ފައިޓާސް އެވެ.
މިކްސް އިވެންޓެއްގެ ގޮތުގައި ދެ ޖިންސްގެ ކުޅުންތެރިންވެސް ބައިވެރިވާގޮތަށް ކުރިއަށްދާ މިމުބާރާތް ހިނގަމުންދާނީ 2 ގްރޫޕަކަށް ބަހާލައިގެންނެވެ. އެގޮތުން ފުރަތަމަ ގްރޫޕުން މޮޅުވާ ދެޓީމެއް ސެމީއަށް ދާނެއެވެ. ދެވަނަ ސެމީގައި އެއްކޮޅުން ބައްދަލުކުރާނީ ދެވަނަ ގްރޫޕްގެ ފުރަތަމަ މެޗުން މޮޅުވާ ޓީމެވެ. މި މެޗްގައި އަނެއްކޮޅުން ވާދަކުރާނީ ދެވަނަ ގްރޫޕުން ބަލިވާ ޓީމާއި ފުރަތަމަ ގްރޫޕުން ތިންވަނަ އަށް ދާ ޓީމް ކުޅެގެން މޮޅުވާ ޓީމެވެ.
މިމުބާރާތް ކުރިއަށްދާނީ ކޮންމެ ޓައި އެއްގައި 7 މެޗް ކުޅޭ ގޮތަށެވެ. އެއީ، ފިރިހެން ސިންގަލްސް، އަންހެން ސިންގަލްސް، ފިރިހެން ޑަބަލްސް، އަންހެން ޑަބަލްސް، އަދި ފިރިހެން ޑަބަލްސް، އަންހެން ޑަބަލްސް އާއި މިކްސްޑް ޑަބަލްސްއެވެ. މިމުބާރާތުގެ ކުޅުން ކުރިއަށްދާނީ ހިތަދޫގައި ހުންނަ އިންޑޯ ބެޑްމިންޓަން އެރީނާ ގައެވެ.
ރޭ މިމުބާރާތުގެ ގުރުލުންވަނީ ކުރިއަށް ގެންގޮސްފައެވެ. އެގޮތުން މުބާރާތުގެ ފުރަތަމަ މެޗްގައި ވާދަކުރަނީ މަލާ ޓީމާއި ބޭރުމަތި ސްޕޯޓްސް ކްލަބެވެ. މިމެޗް އޮންނާނީ މާދަމާ 19.00 ގައެވެ.ހަމައެވަގުތު ކޯޓު 2 ގައި މި މުބާރާތުގެ ދެވަނަ މެޗްވެސް ކުރިއަށްދާނެއެވެ. އެ މެޗްގައި ވާދަކުރާނީ ޓްރީޑީ ސްޕޯޓްސް އެކަޑަމީ އާއި ރޮކެޓް ރޯޔަލްސްއެވެ.
މި މުބާރާތުގެ މެޗްތައް “ވަގުތުންލައިވް” ގެ ފޭސްބުކްޕޭޖުން ލައިވްކުރާގޮތަށް ހަމަޖެހިފައިވެއެވެ. މުބާރާތުގެ އޮންލައިން މީޑިއާ ޕާޓްނަރަކީ އޭއޯނިއުސްއެވެ.
